___Минтақалар ва давлатлараро интеграция жадаллашиб бораётган ҳозирги даврда коррупция барча мамлакатларда қатор муаммоларни келтириб чиқармоқда. Бу иллат жамиятни ич-ичидан емириб, парокандалик сари етаклаши муқаррар. Бинобарин, каттами-кичикми, бойми-камбағалми, қудратлими-кучсизми биронта давлатни коррупциядан холи ҳудуд, деб бўлмайди. БМТ ва Халқаро валюта жамғармасининг маълумотига кўра, жаҳон иқтисодиёти коррупция туфайли йилига 1,5-2,6 триллион долларгача зарар кўрмоқда.
___9 декабрь – Халқаро коррупцияга қарши курашиш куни муносабати билан юртимизда “Коррупция – ривожланишимизга тўсиқ” мавзусида ҳафталик ўтказилмоқда. Ҳафталик доирасида 2021 йил 1 декабрь куни Сув хўжалиги вазирлигида тадбир уюштирилди. Унда Ўзбекистон Республикаси Коррупцияга қарши курашиш агентлиги, Тошкент шаҳар прокуратураси, Стандартлаштириш, сертификатлаштириш ва техник жиҳатдан тартибга солиш илмий-тадқиқот институти вакиллари ўз маърузалари билан иштирок этди.
___Таъкидландики, тараққиётининг янги босқичига қадам қўяётган Ўзбекистон учун коррупциянинг ҳар қандай шаклдаги кўриниши ислоҳотлар шиддатини сусайтириши билан хавфли. Шу боис мамлакатимизда бу иллатга қарши кескин ва муросасиз кураш олиб бориляпти. Хусусан, “Коррупцияга қарши курашиш тўғрисида” Қонун қабул қилинди, Коррупцияга қарши курашиш бўйича республика идоралараро комиссияси ташкил этилди, коррупцияга қарши курашиш бўйича Давлат дастури тасдиқланди.
___2021 йил 1 октябрдан бошлаб барча давлат органлари ва ташкилотлари, шу жумладан Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларида мавжуд штат бирликлари доирасида коррупцияга қарши ички назорат тузилмалари фаолияти йўлга қўйилди.
___Коррупция шундай иллатки, уни бир ёки икки идоранинг саъй-ҳаракати билан йўқ қилиб бўлмайди. Шу боис, тадбир якунида фуқаролар ва бутун жамият коррупцияга қарши биргаликда курашиб, унинг илдизларини йўқ қилишга киришсагина ижобий натижага эришиш мумкин, деган якдил хулосага келинди.
Ўзбекистон Республикаси
Сув хўжалиги вазирлиги
Матбуот хизмати