Usı kúnlerde Qaraqalpaqstanda bolıp turǵan Ózbekstan Respublikası Suw xojalıǵı ministri Sh.Xamraev rayonlarda suw xojalıǵı, sonday-aq, “Kámbaǵallıqtan abadanlıqqa qaray” baǵdarlaması sheńberinde ámelge asırılıp atırǵan jumıslar menen jaqınnan tanıspaqta.

Búgin, Suw xojalıǵı ministri Sh.Xamraev Kegeyli rayonı hákimi A.Kamalov penen ushırasıp, “Kámbaǵallıqtan abadanlıqqa qaray” baǵdarlaması sheńberindegi jumıslardı dodaladı. Juwapkerler usı baǵdarlama tiykarında “Janabazar” awıl puqaralar jıyını aymaǵında ekskavator járdeminde qazılıp atırǵan “Xoja jap” kanalın barıp kórdi.

Sonday-aq, Suw xojalıǵı ministri “Aqtuba” awıl puqaralar jıyını aymaǵındaǵı “Tańmoyın” ishki salmaların tazalap atırǵan eki ekskavator basqarıwshıları menen ushırasıp, sáwbetlesti. Juwapkerlerge jumıslardı jedellestiriw boyınsha kórsetpeler berdi.

Kúnniń ekinshi yarımında Suw xojalıǵı ministri Nókis rayonındaǵı jaqında qayta qazılıp, paydalanıwǵa qosılǵan “Tash arna” kanalın barıp kórdi.

Usı jerde Qaraqalpaqstan Respublikası Suw xojalıǵı ministri B.Juzbaev hám Nókis rayonı hákimi Z.Zaytov usı kanaldıń paydalanılmay turǵan bóleginde shólkemlestirilip atırǵan úyrekxanalar haqqında maǵlıwmat berdi.

Suw xojalıǵı ministri Sh.Xamraev Nókis rayonındaǵı “Aqmanǵıt” kanalınıń rekonstrukciya jumısları menen de tanıstı.Bul kanaldıń 9,5 kilometr bóleginde betonlaw jumısların alp barıw názerde tutılǵan.

Ózbekstan Respublikası Pırezidentiniń tiyisli qararına tiykarlanıp usı kanaldı rekonstrukciyalaw joybarın ámelge asırıw ushın 9,5 mlrd. sum qarjı ajıratılǵan bolıp, búgingi kúnde qurılıs kárxanası tárepinen zárúr texnikalar tartılǵan halda kanaldı betonlawǵa tayarlanbaqta.

1963-jılı paydalanıwǵa tapsırılǵan “Aqmanǵıt” xojalıqlararalıq kanalında betonlaw jumısları juwmaqlanǵannan soń, suw shıǵınlarınıń azayıwı menen birge rayondaǵı “Aqmanǵıt,” “Kattaǵar” hám “Darsan” xojalıqlarındaǵı xalıqtıń qıytaq jerleri jáne 29 fermer xojalıǵınıń jámi 2 mıń 850 gektar egislik maydanlarınıń suw támiynatı jaqsılanadı.

Sonday-aq, Suw xojalıǵı ministri Nókis rayonı hákimi menen “Kámbaǵallıqtan abadanlıqqa qaray” baǵdarlaması sheńberinde ámelge asırılatuǵın jumıslardı dodalap aldı. Aymaqlıq suw xojalıǵı juwapkerlerine Baǵdarlama sheńberindegi jumıslardı, atap aytqanda, xalıqtıń qıytaq jerlerine suw jetkeriw, suw xojalıǵı obektleri átirapında járdemshi xojalıqlar shólkemlestiriw baǵdarındaǵı jumıslardı ayrıqsha qadaǵalawǵa alıw boyınsha tapsırmalar berildi.

Qaraqalpaqstan Respublikası

Suw xojalıǵı ministrligi Baspasóz xızmeti