Suw xojalıǵı sistemasında járiyalanǵan “Balıqshılıq xojalıqları jumısın tártipke salıwǵa járdemlesiw aylıǵı” sheńberinde Tórtkúl rayonındaǵı “Turan altın balıq basseyni” fermer xojalıǵında seminar shólkemlestirildi.
Onda Qaraqalpaqstan Respublikası Suw xojalıǵı ministrligi, “Suw xojalıq qadaǵalaw” inspekciyası juwapkerleri, Tórtkúl, Beruniy hám Ellikqala rayonlarındaǵı balıqshılıq xojalıqlarınıń wákilleri hám suwshılar qatnastı.
Bizge belgili, Ózbekstan Respublikası Suw xojalıǵı ministrliginiń 2025-jıl 26-dekabrdegi tiyisli buyrıǵına tiykarlanıp 2026-jıldıń yanvar ayı – Suw xojalıǵında “Balıqshılıq xojalıqları jumısın tártipke salıwǵa járdemlesiw aylıǵı” dep járiyalanǵan edi. Usı aylıqta ámelge asırılatuǵın ilajlardı suw tutınıwshıları hám balıqshılıq xojalıqları wákillerine túsindiriw hám úgit-násiyatlaw ilajların alıp barıw maqsetinde aymaqlarda kórgizbeli seminarlar ótkerilmekte.
“Suwxojalıqnazorat” inspekciyası Qaraqalpaqstan Respublikası basqarmasınıń baslıǵı I.Ywldoshev shıǵıp sóylep, balıqshılıq tarawındaǵı sońǵı nızamshılıq jańalıqları hám Suw kodeksiniń talapları boyınsha tolıq maǵlıwmat berdi. Atap ótilgenindey, suwdan paydalanıwda tártip-qaǵıydalarǵa ámel etiw tek ǵana nızamlı minnetleme emes, al suw resursların únemlewdiń áhmietli faktorı bolıp esaplanadı.
Sonday-aq, seminarda “Suw esabı”n júrgiziw hám bul processti sanlastırıw máselesi de keń túrde dodalandı. Qatnasıwshılarǵa suwdıń jumsalıwın real waqıt rejiminde anıq esapqa alıw, shártnamalardı elektron túrde dúziw hám elektron sanlı qoltańba (ERI) arqalı tastıyıqlaw tártibi túsindirildi.
Seminar juwmaǵında balıqshılıq xojalıqları jumısın durıs shólkemlestiriw arqalı suw xojalıǵı obektlerine unamsız tásir kórsetiwdiń aldın alıw, sonday-aq, suw jetkerip beriwshi hám tutınıwshı arasındaǵı qatnasıqlardı tolıq sanlastırıw boyınsha tiyisli usınıslar berildi.
Esletip ótemiz: Usı jıldıń yanvar ayı dawamında respublika boylap balıqshılıq xojalıqlarına huqıqıy hám texnikalıq járdem beriw jumısları izbe-iz dawam ettiriledi.
Qaraqalpaqstan Respublikası
Suw xojalıǵı ministrligi baspasóz xızmeti