Nókis rayonı hákimliginde Prezidentimizdiń 2026-jıl 5-fevraldaǵı “Suw resurslarınan paydalanıw nátiyjeliligin arttırıw boyınsha qosımsha ilajlar haqqında”ǵı qararınıń mazmun-mánisi keńnen túsindirildi.
Ilajda Qaraqalpaqstan Respublikası prokuraturası, rayonlıq “Suw jetkerip beriw xızmeti” mámleketlik mákemesi, awıl xojalıǵı juwapkerleri hám fermer xojalıqlarınıń basshıları qatnastı.
Atap ótilgenindey, bul qarar menen suw xojalıǵında jańa tártipler hám jeńillikler engizilmekte. Qararda 2026-2028-jıllarda suwdı únemleytuǵın texnologiyalar engizilgen maydanlardıń kólemin 3,5 million gektarǵa jetkeriw tiykarǵı maqsetli kórsetkish sıpatında belgilengen. Sonıń ishinde, 220 mıń gektar maydanda tamshılatıp suwǵarıw, 110 mıń gektar maydanda jawınlatıp suwǵarıw texnologiyaların engiziw, 600 mıń gektar maydandı lazerli tegislew názerde tutılǵan. Nátiyjede suwdı únemleytuǵın texnologiyalardı engiziw esabınan hár jılı 5 milliard metr kub suw resursların únemlewge erisiledi.
2026-jılı suwdı únemleytuǵın texnologiyalardı engiziwdi keńeytiw ushın kommerciyalıq bankler tárepinen 2,6 trillion sum kredit qarjıları ajıratıladı hám mámleket tárepinen qollap-quwatlaw maqsetinde 800 milliard sum subsidiya qarjıları baǵdarlanadı. Sonday-aq, suwdı únemleytuǵın texnologiyalardı engiziw hám onnan paydalanıw boyınsha Qıtaydıń Sinczyan tájiriybesi tiykarında qánige kadrlardıń mamanlıǵın sistemalı arttırıw jolǵa qoyıladı.
Sonday-aq, ilajda Nókis rayonı “Suw jetkerip beriw xızmeti” mámleketlik mákemesi direktorı D.Usakovtıń suwdı únemlewshi texnologiyalardı engiziw, suwǵarıw dáwirine irrigaciya tarmaqların tayarlaw hám shor juwıw ilajın shólkemleskenlik penen belgilengen múddetlerde ámelge asırıw boyınsha prezentaciyası tıńlandı.
Prezentaciyada, slaydlar arqalı hár bir aymaq boyınsha ámelge asırılǵan jumıslar hám keleshektegi rejeler boyınsha esabat berildi. Sonıń menen birge D.Usakov Prezidentimizdiń usı jıl 5-fevralda qabıl etilgen PQ-47-sanlı qararı boyınsha suwdan paydalanıwda engizilip atırǵan ózgerislerge ayrıqsha toqtap ótti. Hár bir fermer ózleri paydalanıp atırǵan suwdıń esabın durıs júrgiziw ushın usınıslar berip ótti.
Házirgi kúnlerde Qaraqalpaqstannıń basqa rayonlarındaǵı suw xojalıǵı shólkemleri de Prezidentimizdiń PQ-47-sanlı qararınıń mazmun-mánisin túsindiriw, suwdan paydalanıwshılarǵa engizilip atırǵan jańalıqlardı jetkeriwge baǵıshlanǵan ilajlar ótkerilmekte.
Qaraqalpaqstan Respublikası
Suw xojalıǵı ministrligi baspasóz xızmeti