O‘zbekiston Respublikasi Suv xo‘jaligi vazirining birinchi o‘rinbosari – Suv xo‘jaligi obyektlarini ekspluatatsiya qilish agentligi direktori Zokir Ishpulatov Qoraqalpog‘iston Respublikasining Taxiatosh tumanida bo‘lib, Qoraqalpog‘iston nasos stansiyalari va energetika boshqarmasiga qarashli “Suenli” nasos stansiyasida amalga oshirilayotgan ishlar bilan tanishdi.
Tashrif davomida hududda barpo etilayotgan quvvati 1000 kVt bo‘lgan quyosh elektr stansiyasi qurilish jarayoni ham o‘rganildi. Mazkur loyiha nasos stansiyalarining energiya ta’minotini barqarorlashtirish, elektr energiyasiga bo‘lgan xarajatlarni kamaytirish hamda ekologik toza energiya manbalaridan samarali foydalanishni kengaytirishga qaratilgani bilan ahamiyatlidir.
Mutaxassislar tomonidan qayd etilishicha, quyosh panellarining nasos stansiyalari yonida joylashtirilishi bir necha muhim ustunliklarni beradi: birinchidan, suv xo‘jaligi tizimining uzluksiz ishlashini ta’minlash imkoniyati oshadi, ikkinchidan, an’anaviy elektr tarmoqlariga yuklama kamayadi, uchinchidan esa uzoq muddatda iqtisodiy samaradorlik sezilarli darajada ortadi. Shu bilan birga, energiya tejamkor texnologiyalarni joriy etish suv resurslaridan foydalanish samaradorligini ham oshiradi.
Tashrif davomida mavjud texnik shartlarni olish, tarmoqqa ulash jarayonlari hamda loyiha-smeta hujjatlarini tayyorlash bilan bog‘liq ayrim masalalar o‘rganilib, tegishli tashkilotlar bilan joyida muhokamalar o‘tkazildi va muammolarni tezkor hal etish yuzasidan kelishuvlarga erishildi.
Shuningdek, eskirgan nasos agregatlarini zamonaviy, energiya tejamkor nasos qurilmalariga almashtirish ishlari ham ko‘zdan kechirildi. Bu borada nasoslardan samarali foydalanish, elektr energiyasini tejash va texnik ekspluatatsiya talablariga qat’iy rioya qilish yuzasidan aniq tavsiyalar berildi.
Tashrif davomida ma’muriy bino atrofini obodonlashtirish, ko‘kalamzorlashtirish hamda yordamchi xo‘jaliklarni tashkil etish masalalariga ham alohida e’tibor qaratildi. Bu yo‘nalishning dolzarbligi ta’kidlanib, yordamchi xo‘jaliklarni rivojlantirish orqali nafaqat iqtisodiy samaradorlikni oshirish, balki xodimlar uchun qo‘shimcha qulay sharoitlar yaratish mumkinligi qayd etildi.
Umuman olganda, mazkur tashrif suv xo‘jaligi tizimida energiya tejamkor texnologiyalarni keng joriy etish, infratuzilmani modernizatsiya qilish hamda joylarda muammolarni tezkor hal etishga qaratilgan muhim amaliy qadam bo‘ldi.
Qoraqalpog‘iston Respublikasi
Suv xo‘jaligi vazirligi matbuot xizmati