Búgin, yaǵnıy 17-mart kúni Qaraqalpaqstan Respublikası Suw xojalıǵı ministrliginde májilis ótkerildi. Májiliste shólkemlestiriw máselesi kórip shıǵıldı.

Yusupov Baxtiyar Abdullaevich – Qaraqalpaqstan Respublikası suw xojalıǵı ministri lawazımına tayınlandı.

Májiliste Qaraqalpaqstan Respublikası Ministrler Keńesiniń Baslıǵı F.Ermanov suw xojalıǵı tarawında ámelge asırılıwı kerek bolǵan wazıypalarǵa hám Ministr lawazımına tayınlanıp atırǵan kadrdıń jumısına ayrıqsha toqtap ótti.

Óz gezeginde B.Yusupov suw xojalıǵı tarawındaǵı wazıypalardı ministrlik jámááti hám barlıq sistemalı shólkemler menen birgelikte orınlawǵa bar kúsh-ǵayratın jumsaytuǵının atap ótti.

Baxtiyar Abdullaevich 1984-jılı Tashkent irrigaciya hám awıl xojalıǵın mexanizaciyalastırıw injenerleri institutın, 2001-jılı Mámleketlik hám jámietlik qurılıs akademiyasın tamamlaǵan.

Ol miynet jolın 1984-jılı “Qaraqalpaqsuwqurılıs” trestine qaraslı Tórtkúl rayonı qurılıs montaj basqarmasında baslaǵan bolsa, ótken jıllar dawamında awıl hám suw xojalıǵı tarawınıń sistemalı shólkemlerinde juwapkershilikli lawazımlarda nátiyjeli jumıs alıp barıp keldi.

Tayınlawǵa shekem B.Yusupov Ózbekstan Respublikası Suw xojalıǵı ministrliginiń suw xojalıǵı obektleriniń nátiyjeliligin támiyinlew bóliminde jumıs islep kiyatırǵan edi.

Qaraqalpaqstan Respublikası

Suw xojalıǵı ministrligi

Baspasóz xızmeti