Beruniy nasos stanciyaları hám energetika basqarması xızmetkerlerine «Zúráát bayramı» múnásibeti menen basqarmanıń rawajlandırıw qorı hám aymaqlardaǵı járdemshi xojalıqlarda jetistirilgen awıl xojalıǵı ónimleri tarqatıldı.
Ilajda Qaraqalpaqstan Respublikası Suw xojalıǵı ministriniń birinshi orınbasarı A.Urazımbetov, «Suw xojalıǵı qadaǵalawı» inspekciyası baslıǵınıń orınbasarı Z.Irisbaev shıǵıp sóylep, mámleketimiz basshısınıń suw xojalıǵı tarawın rawajlandırıwǵa qaratıp atırǵan itibarı, sońǵı jılları tarawda ámelge asırılıp atırǵan reformalarǵa ayrıqsha toqtap ótti. Sonıń menen birge, Nasos stanciyalarınıń xızmetkerlerin awıl xojalıǵı xızmetkerleri kúni hám «Zúráát bayramı» menen qızǵın qutlıqladı.
– Jaratılǵan sharayatlardan únemli paydalanıp, jumısshı-xızmetkerlerimizdi búgingidey bayramlar aldında qosımsha xoshametlep kelmektemiz, – deydi Beruniy nasos stanciyaları hám energetika basqarması baslıǵı Jasur Xalmuratov. – Bul baǵdarda Ózbekstan Respublikası Suw xojalıǵı ministri Sh.Xamraevtıń Kollegiya májilislerinde bergen tapsırmaları sheńberinde aymaqlardaǵı nasos stanciyaları átirapında járdemshi xojalıqlar shólkemlestirgenbiz. Olarda qaramal, qoy-eshki, tawıq, úyrek hám qoyan baǵıwdı jolǵa qoyǵanbız. Sonday-aq, usı jılı báhárde háwiz qazıp balıq baǵıwdı jolǵa qoyǵan edik. Nátiyjede ózimizdiń kólemizde jetistirilgen balıqtan jumısshılarımızǵa tarqatıw imkaniyatı jaratıldı. Sonıń menen birge kartoshka, piyaz, un, gúrish, may hám gósh ónimleri de tarqatılmaqta.
Ilaj sheńberinde Ellikqala hám Tórtkúl rayonlarındaǵı nasos stanciyaları xızmetkerleriniń jumıs orınlarına barıp awıl xojalıǵı ónimleri tarqatılmaqta.
Háreket etkenlerge bereket beredi, degeni usı bolsa kerek. Nasos stanciyaları átirapındaǵı qorǵaw zonalarınan nátiyjeli paydalanıwǵa qaratılǵan háreket búgin nátiyjesin berip atırǵanın usı basqarma mısalında kóriw múmkin.
Oylawımızsha, bayramlar aldınan basqa da sistemalı shólkemler de bul jumıslar hám nátiyjelerden ruwxlanıp, jumısshı-xızmetkerlerin qosımsha xoshametlew jumısına itibar qaratadı.
Qaraqalpaqstan Respublikası
Suw xojalıǵı ministrligi baspasóz xızmeti