Qaraqalpaqstan nasos stansiyaları hám energetika basqarması juwapkerleriniń qatnasıwında Ámiwdárya rayonındaǵı “Jumabay saǵa” nasos stansiyasında jazǵı-qısqı ilajlar sheńberinde nasos agregatların ońlaw, elektr energiyasınan nátiyjeli paydalanıw hám qorǵaw zonalarına nál egiw jumıslarınıń barısı úyrenildi.

   Kórgizbeli seminar tárizinde ótkerilgen ilaj dawamında bul nasos stansiyasında elektr energiyasın únemlew, elektr dvigatellerdi turaqlı qadaǵalaw, olarǵa únemlewshi úskenelerdi ornatıw boyınsha islengen jumıslar kózden ótkerilip, barlıq nasos stansiyalarında agregatlardı óz waqtında ońlaw jumısları dodalandı.

   Basqarmanıń Energetika bólimi baslıǵı Q.Aliyev elektr energiyasınan nátiyjeli paydalanıw hám únemlew ilajların ámelge asırıw boyınsha házirgi kúnge shekem ámelge asırılǵan jumıslar boyınsha málimleme berdi. Maǵlıwmat beriliwinshe, 7 dana nasos, 25 dana elektrodvigatel, 36 dana kondensator ornatılǵanı esabınan jılına ortasha 1065,271 mıń kVt elektr energiyasınıń únemleniwine erisilgen.

   Sonday-aq, ilaj dawamında nasos stansiyası átirapında shólkemlestirilgen járdemshi xojalıqlarda alıp barılǵan jumıslar dodalanıp, juwapkerlerge kerekli usınıs hám tapsırmalar berildi.

Qaraqalpaqstan Respublikası

Suw xojalıǵı ministrligi baspasóz xızmeti