Qaraqalpaqstan nasos stanciyaları hám energetika basqarması tárepinen Taxtakópir rayonında suw resurslarınan aqılǵa uǵras paydalanıw hám elektr energiyasın únemlew baǵdarında sistemalı reformalar ámelge asırılmaqta. Búgingi kúnde tarawda tek ǵana texnikalıq jańalanıw emes, al basqarıwdıń sapasın arttırıwǵa da ayrıqsha itibar qaratılmaqta.
Búgin Basqarma juwapkerleri tárepinen Taxtakópir rayonındaǵı “Adil sharwa” nasos stanciyasında taraw qánigeleri hám jumısshı-xızmetkerler ushın gezektegi oqıw-ámeliy seminar ótkerildi. Seminarda ótken qıs máwsimi dawamında nasos stanciyalarında elektr energiyasınan nátiyjeli paydalanıw boyınsha ámelge asırılǵan jumıslar juwmaqlanıp, aldaǵı wazıypalar belgilep alındı.
Ilajdıń tiykarǵı teması elektr energiyasın únemlew, elektr dvigatellerdi turaqlı qadaǵalaw hám agregatlardı óz waqtında ońlawdan ibarat boldı.
Atap ótilgenindey, házirgi waqıtta basqarma qaramaǵında jaylasqan 10 nasos stanciyası hám olardaǵı 24 agregat járdeminde Taxtakópir rayonında jámi 3827 gektar egislik maydanları suw menen támiyinlenbekte. Aymaqta energiya jumsalıwı joqarı bolǵan eski SNPE-500/10 markalı agregatlardı zamanagóy hám az quwat jumsaytuǵın texnologiyalarǵa almastırıw jumısları tabıslı juwmaqlandı.
Atap aytqanda, rayondaǵı nasos stanciyalarına 20 dana jańa K500-7 markalı energiya únemlewshi nasos agregatları ornatıldı. Salıstırıw ushın, aldınǵı agregatlar saatına 110 kVt elektr energiyasın jumsaǵan bolsa, jańa qurılmalar tek ǵana 55 kVt jumsaydı. Bul modernizaciya nátiyjesinde jılına jámi 3,142 mln kVt*saat elektr energiyasın únemlep qalıw rejelestirilgen.
Shor juwıw máwsimine rejelestirilgen 5 dana nasos agregatı tolıq ońlanıp, shor juwıw máwsiminde saz jaǵdayda islep tur.
Sonday-aq, juwapkerler nasos stanciyaları átirapında shólkemlestirilgen járdemshi xojalıq jumısın da kózden ótkerdi. Bul baǵdardaǵı jumıslardı jedellestiriw, jerden únemli paydalanıw, xızmetkerlerdiń sociallıq sharayatların jaqsılaw boyınsha tiyisli tapsırmalar berildi.
Qaraqalpaqstan Respublikası
Suw xojalıǵı ministrligi baspasóz xızmeti