Бўзатов туманидаги “Аспантай” хўжаликлараро каналини реконструкция ишларини якунига етказиш бўйича кечиктириб бўлмайдиган вазифаларни белгилаш юзасидан семинар ташкил этилди.

Семинарда Қорақалпоғистон Республикаси Сув хўжалиги вазирлиги, буюртмачи “Қорақалпоғистонсувқурилишинвест” ДМ ва қурувчи ташкилот “Кегейлимахсуссувпудрат” масъулияти чекланган жамиятининг масъул ходимлари иштирок қилди.

Буюртмачи “Қорақалпоғистонсувқурилишинвест” ДМ бош муҳандиси Н.Каипов томонидан “Аспантай” хўжаликлараро каналини реконструкцияси бўйича объектда  қилинган ишлари ҳақида семинар иштирокчиларга атрофлича маълумотлар бериб ўтди.

“Аспантай” хўжаликлараро канали Бўзатов тумани ирригация бўлими балансида бўлиб, канал 1986 йилда фойдаланишга топширилган. Узунлиги 41,3 километрни ташкил қиладиган мазкур каналнинг сув ўтказувчанлик қобилияти секундига 36 метр кубни ташкил қилади.

“Аспантай” хўжаликлараро канали “Тўрткўл” магистрал каналининг 172-пикетида жойлашган бош гидротехник иншоотидан сув олиб, Бўзатов туманининг “Қўсқанатов” ва “Аспантай” ҳудудларидаги фермер хўжаликлари ва аҳоли томорқа майдонларини сув билан таъминлайди.

Семинар давомида “Қорақалпоғистонсувқурилишинвест” ДМ масъуллари томонидан канал қирғоқларини текисшлаш, гидротехник иншоотларни қуриш ишларини қисқа муддат ичида якунлаб, “Аспантай” каналини жорий йилнинг 1 декабрига қадар тўлиқ фойдаланишга топшириш бўйича пудратчи ташкилот раҳбари Б.Сапаров ҳамда техник назоратчи Е.Кошековларга топшириқлар берилди.

Айни пайтда объектда 5 та экскаватор, 2 дона бульдозер, 2 та юк автомашинаси ҳамда 15 нафар ишчи ходимлар каналнинг реконструкция ишларига жалб қилинган.

“Аспантай” хўжаликлараро каналини реконструкция қилиш натижасида каналининг сув ўтказиш қобилияти кўтарилиб, сувнинг тезлиги ошади ва 6000 гектар майдоннинг сув таъминоти яхшиланиши кутилмоқда.

Қорақалпоғистон Республикаси

Сув хўжалиги вазирлиги Матбуот хизмати