Тахтакўпир туманидаги “КС-4” туманлараро коллектори 1971 йилда ишга туширилган бўлиб, унинг умумий узунлиги 116,0 километрни лойиҳавий сув ўтказиш қобилияти секундига 18,0 метр кубни ташкил этади. Мазкур коллектор ҳудуддаги 8 минг 600 гектар майдонларнинг мелиоратив ҳалатининг барқарорлигини таъминлашга хизмат қилади.

      Кейинги йилларда коллекторнинг ён қияликлари ўпирилиб, сув йўлини тўсилиши, ўзанида қамиш ўсиб кетгани зах сувларининг меъёр даражасида оқиб чиқиб кетишига тўсқинлик  қилиб келаётган эди. Шу боис, Ҳукуматимизнинг тегишли қарор ва дастурлари асосида Тахтакўпир туманидаги “КС-4” туманлараро коллекторининг ПК100+00 дан ПК210+00 гача қисмини реконструкция қилиш ишлари белгиланган.  

      Бугун Сув хўжалиги вазирлиги томонидан тасдиқланган ҳафталик режа графикда белгиланган вазифалар доирасида сув хўжалиги объектларида қурилиш ва реконструкция ишларини муҳокама этиш ҳамда келгуси вазифаларни белгилаб олиш мақсадида «Қорақалпоғистонсувқурилишинвест» давлат муассасаси маъсуллари томонидан Тахтакўпир туманидаги “КС-4”  туманлараро коллекторининг реконструкция қилиш ишлари ўрганилди.

     Масъулларнинг маълумот беришича,  “Элликқалъамахсуссувпудрат” МЧЖ томонидан “КС-4”  коллекторининг  2024 йил давомида 11 километр қисмини реконструкция  қилиш белгиланган бўлса, бугунги кунгача объектнинг 7 километр қисмида қазиш ишлари бажарилган.  Шу билан бирга коллекторни рекнструкция қилиш доирасида ер ости сизот сувларини назорат қилиш имконини берувчи “Дайвер” қурилмаларини ўрнатиш ишлари ҳам олиб борилмоқда.

      Ўрганиш давомида ҳазирги кунда объектда жами 6 дона махсус техникалар ҳамда 10 нафар ишчи-ходимлар иш олиб бораётгани таъкидлаб ўтилди. Шунингдек, «Қорақалпоғистонсувқурилишинвест» ДМ масъуллари пудрат қурилиш корхонаси ходимларига “КС-4”  коллекторининг реконструкция ишларини белгиланган муддатда ва сифатли  бажариш юзасидан кўрсатма бердилар.

      Маълумот учун Тахтакўпир туманидаги “КС-4”  туманлараро коллекторининг реконструкция ишлари амалга оширилгач ҳудуддаги 7 минг 432 гектар гектар майдоннинг мелиоратив ҳолати яхшиланади. Шу билан бирга 620 гектар майдоннинг ер ости сизот сувлари меъёр даражасига тушурилиб, 1167,5 гектар майдоннинг мелиоратив ҳолати барқарорлиги таъминланади.

Қорақалпоғистон Республикаси

Сув хўжалиги вазирлиги Матбуот хизмати