Нукус туманидаги “КС-1-4” коллектори 1980 йилда фойдаланишга топширилган. Коллекторнинг умумий узунлиги 31,3 километрни ташкил этиб, лойиҳавий сув ўтказиш қобилияти секундига 4,5 метр кубни ташкил этган.
Бироқ, кейинги йилларда коллекторнинг айрим жойларида тупроқ қумлоқ бўлганлиги сабабли коллекторнинг ён қияликлари ўпирилиб жарликлар пайдо бўлган. Сув йўли тўсилиши оқибатида коллекторнинг иш фаолиятига салбий таъсир кўрсатиб, зах сувларининг меъёр даражасида оқиб чиқиб кетишига тўсқинлик қилиб, ҳудуддаги экин майдонларининг мелиоратив ҳолати ёмонлашишига олиб келаётган эди.
Ҳукуматимизнинг тегишли қарор ва дастурлари асосида Нукус туманидаги “КС-1-4” хўжаликлараро коллекторининг ПК26+00 дан ПК126+00 гача қисмини реконструкция қилиш белгиланди. Бугунги кунда мазкур коллекторнинг белгиланган қисмида пудратчи ташкилот “Тўрткўлли Нураддин Экскаваторчи” МЧЖ томонидан реконструкция ишлари амалга оширилмоқда.
Сув хўжалиги вазирлигининг ҳафталик режа кўрсаткичларини мониторинг қилиш бўйича белгиланган режа графигига мувофиқ, бугун «Қорақалпоғистонсувқурилишинвест» давлат муассасаси масъуллари томонидан “КС-1-4” коллектори реконструкция ишлари ўрганилди.
Маълумот берилишича, ушбу коллекторнинг 2024 йил давомида белгиланган 13,2 километр қисмида реконструкция, яъни қазиш ишлари тўлиқ якунланган. Бугунги кунда коллекторга 3 дона гидротехник иншоотларни янгидан қуриш ва 2 дона темир-бетон кўприкни реконструкция (демонтаж) қилиш ишлари бажарилмоқда. Реконструкция доирасида эски кўприклар ўрнига галереяли йиғма темир бетон ўтказгичлар ўрнатилмоқда.
Ўрганиш давомида мазкур сув ўтказгичининг афзаллиги, қувурлига насбатан сув ўтказиш қобилияти юқорилиги таъкидланиб, қурилиш ишларининг сифатини назорат қилиш ва ўз муддатида якунлаш бўйича “Тўрткўлли Нураддин Экскаваторчи” МЧЖ масъул вакилига топшириқ берилди.
Маълумот учун: “КС-1-4” хўжаликлараро коллекторида реконструкция ишлари амалга оширилганидан сўнг, ҳудуддаги 3 минг гектар экин майдонларининг мелиоратив ҳолати яхшиланишига ва 1670 гектар майдонларнинг ер ости сизот сувлари меъёр даражасига туширилишига эришилади.
Қорақалпоғистон Республикаси
Сув хўжалиги вазирлиги Матбуот хизмати