Búgin, yaǵnıy 12-may kúni Qaraqalpaqstan Respublikası Suw xojalıǵı ministrliginde májilis ótkerildi. Májiliste shólkemlestiriw máselesi kórip shıǵıldı.

Qaraqalpaqstan Respublikası Suw xojalıǵı ministriniń birinshi orınbasarı lawazımına Allabergenov Rashid Ismailovich tayınlandı.

Ózbekstan Respublikası Suw xojalıǵı ministrligi janındaǵı «Suw xojalıqnazorat» inspekciyasınıń baslıǵı R.Raximov, Qaraqalpaqstandaǵı barlıq suw xojalıǵı shólkemleriniń basshıları hám ministrlik apparatı xızmetkerleri qatnasqan májiliste Qaraqalpaqstan Respublikası Suw xojalıǵı ministri Baxtiyar YUsupov shıǵıp sóylep, Qaraqalpaqstan Respublikası Húkimetiniń usınısı menen Suw xojalıǵı ministrliginiń buyrıǵı menen birinshi orınbasar lawazımına tayınlanǵan kadrdıń jumıs iskerligi, atap aytqanda suw xojalıǵı tarawındaǵı tájiriybesine ayrıqsha toqtap ótti.

Óz gezeginde R.Allabergenov suw xojalıǵı tarawındaǵı wazıypalardı ministrlik jámááti hám barlıq sistemalı shólkemler menen birgelikte orınlawǵa bar kúsh-ǵayratın jumsaytuǵının atap ótti.

Maǵlıwmat ushın: R.Allabergenov 1992-jılı Tashkent irrigaciya hám awıl xojalıǵın mexanizaciyalaw injenerleri institutın tamamlaǵan. Bilimlendiriw boyınsha qánigeligi injener-gidrotexnik.

Miynet jolı dawamında «Boz-yob» suwdan paydalanıwshılar associaciyasınıń baslıǵı, Qaraqalpaqstan Respublikası Gidrogeologiyalıq-meliorativlik ekspediciyası Ellikqala rayonı bóliminiń baslıǵı, Ellikqala rayonı hákimligi shólkemlestiriw-qadaǵalaw toparınıń baslıǵı, Tómengi Ámiwdárya irrigaciya sistemaları basseyn basqarmasına qaraslı «Paxtaarna-Nayman» irrigaciya sisteması basqarmasınıń baslıǵı, Ellikqala rayonı hákiminiń kapital qurılıs, kommunikaciyalar, kommunal xojalıq hám abadanlastırıw máseleleri boyınsha birinshi orınbasarı, Qaraqalpaqstan Respublikası Miynet hám xalıqtı sociallıq qorǵaw ministri, Qaraqalpaqstan meliorativlik ekspediciyası baslıǵınıń birinshi orınbasarı, Xalıqaralıq Araldı qutqarıw qorı atqarıw komitetiniń Nókis filialı direktorı sıyaqlı juwapkershilikli lawazımlarda jumıs alıp barǵan.

Sonday-aq, májiliste suw xojalıǵı tarawındaǵı keshiktirip bolmaytuǵın máseleler sın kózqarastan dodalandı. «Suw xojalıǵınazorat» inspekciyası baslıǵınıń orınbasarı shıǵıp sóylep, suwdı únemleytuǵın texnologiyalardı engiziw boyınsha «Áhmietli – 20 kúnlik» járiyalanǵanın hám bul baǵdarda suw xojalıǵı juwapkerleriniń aldında turǵan wazıypalarǵa toqtap ótti. Dodalanǵan máseleler boyınsha wazıypalar belgilep alındı.

Qaraqalpaqstan Respublikası

Suw xojalıǵı ministrligi Baspasóz xızmeti