Qaraqalpaqstan Respublikası Suw xojalıǵı ministrliginde Ministrler Keńesiniń Sırtqı biyǵárez járdem qarjıların (grantlar) tartıw hám donorlar menen islesiw bólimi juwapkerleriniń qatnasıwında tarawǵa grant qarjıların tartıw boyınsha oqıw-seminar ótkerildi.
Ilaj aldınan Qaraqalpaqstan Respublikası Suw xojalıǵı ministri B.Juzbaev Qaraqalpaqstan Respublikası Joqarǵı Keńesiniń Baslıǵı tárepinen 2025-jıldıń 25-yanvarında Suw xojalıǵı ministrligine investiciyalar hám grantlar ajıratıwǵa baylanıslı “Jol kartası” tastıyıqlanǵanlıǵı hám onda usı baǵdarda sistema shólkemlerine oqıw seminarların shólkemlestiriw názerde tutılǵanlıǵı hám usı “Jol kartası”nda belgilengen wazıypalardıń áhmietine toqtap ótti.
Qaraqalpaqstandaǵı barlıq suw xojalıǵı shólkemleriniń basshıları qatnasqan ilajda Qaraqalpaqstan Respublikası Ministrler Keńesiniń Sırtqı biyǵárez járdem qarjıların (grantlar) tartıw hám donorlar menen islesiw bóliminiń baslıǵı K.Idirisov, bólim qánigeleri B.Nagmetov hám B.Sultamuratov suw xojalıǵı tarawına investiciya hám grant qarjıların tartıw, atap aytqanda, aymaqlardaǵı máhálleler menen birgelikte grant tańlawlarında qatnasıp, alıs aymaqlarǵa suw jetkeriw baǵdarındaǵı mashqalalardı sheshiw boyınsha qanday ilajlardı ámelge asırıw, jumıstı neden baslaw kerekligi boyınsha tolıq maǵlıwmat berdi.
Ashıqtan-ashıq sóylesiw tárizinde ótkerilgen oqıw-seminar dawamında suw xojalıǵı sisteması shólkemleriniń basshıları tema boyınsha ózlerin qızıqtırǵan sorawlarǵa juwaplar aldı.
Qaraqalpaqstan Respublikası
Suw xojalıǵı ministrligi baspasóz xızmeti