Usı kúnlerde Qaraqalpaqstanda bolıp turǵan Ózbekstan Respublikası Suw xojalıǵı ministri Sh.Xamraev rayonlarda suw xojalıǵı tarawında, sonday-aq, “Kámbaǵallıqtan abadanlıqqa qaray” baǵdarlaması sheńberinde ámelge asırılıp atırǵan jumıslar menen jaqınnan tanıspaqta.

    Búgin Ministr Kegeyli rayonında bolıp, baǵdarlama sheńberindegi jumıslardı úyrendi hám rayon hákimi menen ushırasıp, aldaǵı wazıypalardı dodaladı.

   Ushırasıwda Kegeyli rayonı hákimi A.Kamalov “Kámbaǵallıqtan abadanlıqqa qaray” baǵdarlaması sheńberinde kanallardı tazalaw jumıslarında belsendilik kórsetip atırǵan ekskavator basqarıwshıların qosımsha qollap-quwatlaw jumısları shólkemlestirilip atırǵanlıǵın atap ótti.

   Atap aytqanda, “Jalpaq jap” awıl puqaralar jıyını aymaǵındaǵı kanaldı ısıtıwda qatnasıp atırǵan ekskovatorshılarǵa bir qaptan un, may hám basqa da azıq-awqat ónimleri tapsırıldı.

   Suw xojalıǵı ministri Sh.Xamraev Kegeyli rayonı hákimi A.Kamalovtıń ekskavatorshılardı qollap-quwatlaw baǵdarındaǵı bul baslaması basqalarǵa úlgi bolatuǵının, ápiwayı mexanizatorlardıń pidákerlik miynetine itibar tiykarında jumıs ónimdarlıǵın arttırıwǵa qaratılǵan ilajlardan biri ekenin atap ótti.

   Sonday-aq, suw xojalıǵı juwapkerlerine xalıqtıń qıytaq jerleriniń suw támiynatın jaqsılawǵa qaratılǵan jumıslardı jedellestiriw boyınsha kórsetpeler berdi.

    Maǵlıwmat ushın: Kegeyli rayonında “Kámbaǵallıqtan abadanlıqqa qaray” baǵdarlaması sheńberinde “Aqtuba,” “Kók ózek,” “Abat,” “Jalpaq jap” hám “Kumshungul” awıl puqaralar jıyınlarındaǵı kanallar hám ishki salmalardı rekonstrukciyalaw jumısları alıp barılmaqta. Bunıń ushın 9 ekskavator tartılǵan.

Qaraqalpaqstan Respublikası

Suw xojalıǵı ministrligi baspasóz xızmeti