Aralboyı aymaǵında mámleketimizdiń basqa aymaqlarına qaraǵanda egislik maydanların suwǵarıw dáwiri kóbirek, yaǵnıy shor juwıw dáwiri de bar. Bul dáwirde de kanallarda suw bolıwı esabınan suw joǵaltıwların azaytıwǵa qaratılǵan ilaj – kanallardı betonlawǵa az waqıt qaladı.

    Qaraqalpaqstanlı suwshılar usı faktordı esapqa alǵan halda suwǵarıw máwsiminde de kanallardı betonlaw jumısların izbe-iz dawam ettirmekte.

    – Qıytaq jer hám ǵálle maydanlarında suwǵarıw jumısları juwmaqlanıwı menen kanallardı betonlaw jumısların baslap jiberdik, – deydi Qońırat rayonı “Suw jetkerip beriw xızmeti” mámleketlik mákemesiniń direktorı Sh.Djadigerov. – Házirgi waqıtta óz esabımızdaǵı “Ayran jap” kanalında betonlaw jumısları alıp barılmaqta. Jumıs 2 smenada shólkemlestirilip, qurılıs basında ıssı awqat hám basqa da zárúr sharayatlar jaratılǵan.

    Qullası, hár bir kún, saattan únemli paydalanıwdıń barlıq ilajları kórilmekte. Sebebi, qıstıń qaqaman suwıǵında hám shor juwıw dáwiri ushın búgin belgilengen bólimde betonlastırıw jumısların juwmaqlap, jáne egislik maydanlarǵa suw beriwdi dawam ettiriwimiz zárúr.

   Sonıń menen bir qatarda rayondaǵı Axunbabaev, Ájiniyaz, Qońırat, O.Qurbaniyazov, Xorezm hám Kóklikól aymaqlarında jaylasqan fermer xojalıqları hám awıl xojalıǵı kárxanaları tárepinen ishki salmaların betonlastırıw jumısları alıp barılmaqta.

    Esletip ótemiz, bıyılǵı jılı Qońırat rayonındaǵı “Jınıshke” xojalıqlar aralıq kanalı da degishli baǵdarlama tiykarında betonlastırıw jumısları baslanǵan. Baǵdarlama sheńberinde 2,5 kilometr bólegin betonlaw belgilengen bolsa, házirgi kúnge shekem “Qubla Bunyodkor” JShJ qurılıs kárxanası tárepinen 1 kilometr bóleginde betonlaw jumısları ámelge asırılıp, bul jumıslar dawam etpekte.

Qaraqalpaqstan Respublikası

Suw xojalıǵı ministrligi baspasóz xızmeti