Qaraqalpaqstan Respublikası Suw xojalıǵı ministrliginde Suw kodeksiniń mazmun-mánisin túsindiriw, onda belgilengen huqıqıy tiykarlar hám tarawdaǵı búgingi kúnniń áhmietli máselelerin dodalawǵa baǵıshlanǵan májilis bolıp ótti.
Májiliste Qaraqalpaqstan Respublikası Joqarǵı Keńesiniń deputatları, Qaraqalpaqstandaǵı barlıq suw xojalıǵı shólkemleriniń basshıları, suw xojalıǵı ministrliginiń bólim hám sektor basshıları qatnastı.
Dodalawlar aldınan Qaraqalpaqstan Respublikası Suw xojalıǵı ministri B.YUsupov hám Ózbekstan Respublikası Suw xojalıǵı ministrliginen kelgen wákil Z.Irisbaev usı jıldıń 30-iyul sánesinde Ózbekstan Respublikası Nızamı menen tastıyıqlanǵan Suw kodeksiniń endi suw resursların basqarıwda tiykarǵı principlerin belgileytuǵın áhmietli hújjeti haqqında túsinik berdi.
Atap ótilgenindey, Suw kodeksi Ózbekstan Respublikası Prezidentiniń 2020-jıl 10-iyuldegi “Ózbekstan Respublikası suw xojalıǵın rawajlandırıwdıń 2020-2030-jıllarǵa mólsherlengen koncepciyasın tastıyıqlaw haqqında”ǵı PP-6024-sanlı Pármanınıń orınlanıwın támiyinlew maqsetinde Suw xojalıǵı ministrligi tárepinen islep shıǵılǵan.
Suw kodeksinde respublikada suw qatnasıqları tarawındaǵı tiykarǵı huqıqıy hújjetler sistemalastırılǵan, Ózbekstan Respublikasınıń “Suw hám suwdan paydalanıw haqqında”ǵı Nızamı, sonday-aq, Ózbekstan Respublikası Prezidentiniń 8 pármanı hám 14 qararı jáne Húkimettiń 26 qararındaǵı normalar birlestirilgen.
Suw kodeksi suw, suw obektleri hám suw xojalıǵı qurılmalarınan aqılǵa uǵras paydalanıw hám olardı qorǵaw menen baylanıslı qatnasıqlardı tártipke saladı. Ol xalıq, ekonomika hám ekosistemalardı turaqlı suw támiynatı menen támiyinlew, sonday-aq, suw resursların saqlaw hám tiklewge qaratılǵan.
Hújjette xalıqtı kepillengen sapalı ishimlik hám xojalıq-turmıslıq suw menen támiyinlew, sanitariyalıq qáwipsizlikti támiyinlew hám densawlıqtı saqlaw máselelerine ayrıqsha itibar qaratılǵan. Suw obektlerinen paydalanıwda olardı qorǵaw, suw ekosistemaların saqlaw hám suw qatnasıqları subektleriniń teń huqıqların támiyinlew tiykarǵı wazıypa etip belgilengen.
Májiliste Qaraqalpaqstan Respublikası Joqarǵı Keńesiniń Agrar, suw xojalıǵı, tábiyattı qorǵaw hám ekologiya máseleleri komiteti baslıǵınıń orınbasarı M.Abdirov suw resurslarınan paydalanıwdaǵı juwapkershilik hám minnetlemeler jáne suwdı esapqa alıw, únemlew, bólistiriw sıyaqlı máselelerge toqtap ótti hám bul baǵdarda ámelge asırılatuǵın áhmietli wazıypalar belgilep alındı.
Qaraqalpaqstan Respublikası
Suw xojalıǵı ministrligi baspasóz xızmeti