Qaraqalpaqstan Respublikası Suw xojalıǵı ministrliginde ÓzLiDeP Qaraqalpaqstan Respublikası Keńesi tárepinen suw xojalıǵı sistemasında “Siyasiy belsendilik hám intakerlik – reformalar tiykarı” atamasında ilaj ótkerildi.
Ministrlik apparatı xızmetkerleri hám videokonferencbaylanıs tárizinde sistemalı shólkemlerdiń juwapkerleri qatnasqan ilajda siyasiy sana hám belsendilikti arttırıw, jámiechilikti partiyanıń ideyalıq maqsetleri menen jaqınnan tanıstırıwǵa ayrıqsha itibar qaratıldı.
Bul ilaj suw xojalıǵı tarawı xızmetkerleri menen bekkem qarım-qatnas ornatıw, ámelge asırılıp atırǵan siyasiy reformalardıń mánisin keń jámiechilikke jetkeriw, partiyanıń saylawaldı baǵdarlaması sheńberinde suw resursların aqılǵa uǵras basqarıw hám tarawdaǵı tiykarǵı wazıypalardı qánigeler menen tereń dodalawǵa qaratıldı.
Ilajda Qaraqalpaqstan Respublikası Joqarǵı Keńesi komitetiniń baslıǵı Sharap Otemisov, xalıq deputatları Nókis qalalıq Keńesiniń deputatı Iristi Quttimuratova hám ÓzLiDeP Qaraqalpaqstan Respublikalıq Keńesi apparatınıń baslıǵı Adip Aybergenov shıǵıp sóylep, mámlekette ámelge asırılıp atırǵan siyasiy reformalar, suw xojalıǵındaǵı mashqalalardı saplastırıwda siyasiy baslamalardıń áhmieti hám birge islesiw mexanizmlerin bekkemlew zárúrligi haqqında óz pikirlerin bildirdi.
ÓzLiDePtiń saylawaldı baǵdarlamasında suw resursların saqlaw, suwdı únemleytuǵın texnologiyalardı engiziw, “Taza suw” joybarı arqalı xalıqtıń turmıs sapasına unamlı tásir kórsetiw, mámleketlik-jeke menshik sheriklikti keńeytiw sıyaqlı baslamalar tiykarǵı orın ielegeni atap ótildi.
Ilaj sheńberinde Suw xojalıǵı ministrligi sistemasında ÓzLiDePtiń jańa baslanǵısh partiya shólkemi dúzildi. Onıń baslıǵı etip ministrliktiń málimleme xızmeti boyınsha bas qánigesi Atajanov Ǵayratjan Madrimovich saylandı.
Áhmietlisi sonda, ilaj sheńberinde 103 xızmetker partiya aǵzası bolıw tilegin bildirdi hám reformalardı ámelge asırıw procesinde belsene qatnasıwǵa tayar ekenin málim etti.
– Búgingi sóylesiwde biz tek ǵana partiya baǵdarlaması menen tanısıp qalmastan, al puqaralıq jámietiniń rawajlanıwında hár birimizdiń ornımız bar ekenligin jáne bir márte sezdik, – deydi Qaraqalpaqstan Respublikası Suw xojalıǵı ministrliginiń Qurılıs hám ońlaw jumısların shólkemlestiriw sektorınıń baslıǵı Aydos Maxamatdinov. – Siyasiy belsendilik – bul tek saylawaldı procesinde emes, al turaqlı, izbe-iz hám intakerlik jumıs bolıp esaplanadı. Mine búgin men partiya qatarına kiriwge tilek bildirdim hám aǵzalıq gúwalıǵın qabıl ettim. Endi óz baslamalarımızdı partiya deputatları arqalı alǵa qoyıw imkaniyatına iemiz. Suw xojalıǵındaǵı mashqalalardı sheshiwde de áne usınday qatnas, juwapkershilik hám birge islesiw úlken áhmietke ie.
Ilaj sońında ÓzLiDeP Qaraqalpaqstan Respublikası Keńesiniń juwapkerleri keleshekte bul sıyaqlı baslamalardı qollap-quwatlawǵa hám jańa ideyalar ústinde birgelikte islewge tayar ekenligin bildirdi.
Qaraqalpaqstan Respublikası
Suw xojalıǵı ministrligi baspasóz xızmeti