Qaraqalpaqstan Respublikasında 2025-2026-jıllardıń gúzgi-qısqı máwsiminde irrigatsiya-melioratsiya obektlerinde belgilengen ilajlardı óz múddetlerinde ámelge asırıw boyınsha rayonlardaǵı suw xojalıǵı obektlerinde “hasharlar” shólkemlestirilmekte.
– Ózbekstan Respublikası Sub xojalıǵı ministrliginiń 2025-jıl 2-sentyabrdegi 147-sanlı buyrıǵınıń orınlanıwın támiyinlew hám onda belgilengen wazıypalardı sistemalı orınlaw boyınsha aymaqlıq buyrıq qabıl etilip, shtab shólkemlestirildi, Qaraqalpaqstan Respublikası Suw xojalıǵı ministrliginiń Irrigaciya sistemaları hám suwǵarıw tarmaqlarınan paydalanıw boyınsha bas qánigesi Sharyar Jaqsımuratov.
Usı hújjette suw alıw limitleri, shor juwılatuǵın, ıǵal suw beriletuǵın hám basqa da suwǵarıw jumısları ámelge asırılatuǵın maydanlar, kanallar hám suwǵarıw tarmaqların tazalaw, gidrotexnika qurılmaların hám gidropostlardı ońlaw, melioraciya obektlerinde ońlaw-tiklew, nasos agregatların ońlaw sıyaqlı 17 baǵdar boyınsha ilajlar rejesin belgilep alǵanbız.
Házirgi kúnlerde gúzgi-qısqı ilajlardı ámelge asırıw, suwǵarıw tarmaqların tazalaw jumısların shólkemlestiriw aymaqlarda xasharlar shólkemlestirilmekte. Aymaqlardaǵı suwshılardan ibarat hasharshılarǵa túslikte obektlerdiń basında ıssı awqat berilip atırǵanı, jumıs ónimdarlıǵın arttırıwǵa xızmet etpekte.
Bul baǵdardaǵı jumıslardıń orınlarda sistemalı shólkemlestiriliwi kelesi jılı suw resursların óz waqtında tutınıwshılarǵa jetkeriw, suwdan nátiyjeli paydalanıwdı támiyinlewge úlken úles qosatuǵını sózsiz. Qaraqalpaqstanda 2025-2026-jıllardıń gúzgi-qısqı máwsiminde belgilengen ilajlar sheńberinde irrigaciya-melioraciya obektlerin tazalaw jumıslarına ekskavatorlar da tartılmaqta. Bul boyınsha erteń video kórinisler tayarlap, berip barıwǵa háreket etemiz.
Qaraqalpaqstan Respublikası
Suw xojalıǵı ministrligi baspasóz xızmeti