Ózbekstan Respublikası Suw xojalıǵı ministri Sh.Xamraev suw xojalıǵı obektlerinde gúzgi-qısqı ilajlar sheńberinde ámelge asırılıp atırǵan wazıypalar, mámleketlik baǵdarlamalardıń orınlanıwı hám suw resurslarınan nátiyjeli paydalanıw baǵdarındaǵı jumıslar menen jaqınnan tanısıw, keleshektegi wazıypalardı aymaqlardaǵı juwapkerler menen dodalaw maqsetinde Qaraqalpaqstan Respublikasına bardı.
Suw xojalıǵı ministri dáslep, Kegeyli rayonı “Jańa bazar” aymaǵındaǵı “Begler begi” kanalın betonlastırıw jumısların barıp kórdi. Bul jerdegi xasharda qatnasıp atırǵan suwshılar menen sáwbetlesti.
Suw xojalıǵı ministri Sh.Xamraev sóylesiw dawamında aymaqtaǵı suw xojalıǵı juwapkerlerinen betonlanıp atırǵan bul kanaldan qansha suw tutınıwshısı paydalanatuǵını, suwǵarılatuǵın ulıwma maydan haqqında soradı. Sáwbetlesiw dawamında suwǵarılatuǵın maydanǵa salıstırǵanda usı kanaldıń suw ótkeriw qábileti joqarı ekeni, bul bolsa betonlastırıw jumısların baslawdan aldın durıs esap-sanaq etilmegeni sınǵa alındı.
Bárinen burın, suwdı únemlewge qaratılǵan betonlaw jumısları da esap-sanaqlı bolıwı, jumsalatuǵın qárejetlerden de maqsetli hám aqılǵa uǵras paydalanıp, kóbirek kanallardı betonlaw zárúr ekenligi atap ótildi.
Sonday-aq, aymaqtaǵı fermer hám máhálledegi qıytaq jer ieleri betonlastırıw jumıslarına hasharǵa kelip atır ma, joq pa, mine, usı máseleler de dodalanıp, bul jumıslarǵa fermer hám basqa da suw tutınıwshıları da óz úlesin qosıwı zárúrligi boyınsha tapsırmalar berildi.
Kegeyli rayonı “Suw jetkerip beriw xızmeti” DM direktorı Keńesbay Temirxanovqa berilgen tapsırmalardı qadaǵalawǵa alıp, orınlanıwın támiyinlew, hámshilerge jeterli sharayat jaratıw, suwshı xızmetkerlerdi qosımsha xoshametlep barıw ushın járdemshi xojalıqlardı, sonıń ishinde, úyrekxanalardı shólkemlestiriw boyınsha kórsetpe berildi.
Sonday-aq, suw xojalıǵı ministri usı rayondaǵı “Jiluan jap” kanalında mámleketlik baǵdarlama sheńberinde alıp barılıp atırǵan betonlastırıw jumısları menen tanıstı. Alınıp atırǵan kúnlik beton kólemin kóbeytiw, jumıstı eki smenada shólkemlestiriw boyınsha juwapkerlerge tapsırmalar berildi.
Maǵlıwmat ushın: “Jiluan jap” kanalı 1952-jılı qurılǵan. Ulıwma uzınlıǵı 15,0 km bolıp, jobalastırılǵan suw ótkeriwsheńlik qábileti kanal basında 5,0 m3/sek. Rekonstrukciya jumısları alıp barılatuǵın PK107+32 den PK117+32 piketi aralıǵında suw ótkiziwsheńlik qábileti 3,0 m/3 sek.
“Jiluan jap” kanalı “Jiluan jap” MPJ, “Nurlı bostan” MPJ, “Janabazar” APJ hám “Aktuba” APJ aymaǵındaǵı jámi 4918 gektar jer maydanların suw menen támiyinlewge xızmet etedi.
Baǵdarlama sheńberinde kanaldıń PK107+32 den PK117+32 piketine shekemgi 1,5 km bólegin betonlastırıw, sonday-aq, 1 dana suw tosıwshı gidrotexnikalıq qurılma, 8 dana suw alıwshı gidrotexnikalıq qurılmanı rekonstrukciyalaw hám temir tosıqlar ornatıw jumısları belgilengen.
Obektte “Nókis drenaj rekonstrukciya” JShJ tárepinen qurılıs-montajlaw jumısları ámelge asırılmaqta. Obekttiń ulıwma qurılıs-montajlaw jumıslarınıń bahası 2,526 mln.sumdı quraydı. Búgingi kúnge shekem kanaldıń 0,5 km bóleginde betonlastırıw jumısları orınlanǵan.
Qaraqalpaqstan Respublikası
Suw xojalıǵı ministrligi baspasóz xızmeti