Ózbekstan Respublikası Suw xojalıǵı ministri Shavkat Hamraev Qaraqalpaqstanǵa barıp, kanallardı rekonstrukciyalaw, suw xojalıǵı obektlerinde qurılıs hám gúzgi-qısqı jumıslardıń barısı menen tanıstı.
Suw xojalıǵı ministri dáslep Taqıyatas rayonındaǵı “Eski Keneges” kanalın rekonstrukciyalaw jumısların barıp kórdi.
Bul kanaldı rekonstrukciyalaw sheńberinde 21,5 km bólegin betonlaw belgilengen. Qurılıs jumısları bas jumıstı bólip alıp islewshi “Voris China” JShJ qospa kárxanası tárepinen alıp barılmaqta. Usı jıldıń 1-noyabr jaǵdayına obektte 25476,9 mln. sumlıq qurılıs-montajlaw jumısları orınlanǵan.
Málim etiwinshe, “Eski Keneges” kanalı rekonstrukciyalanǵannan soń, Taqıyatas rayonı “Naymankól,” “Keneges” hám “Saraykól” APJ aymaqlarındaǵı jámi 7 mıń 800 gektar egislik maydanlarınıń suw támiynatı jaqsılanadı.
Suw xojalıǵı ministri Sh.Xamraev tárepinen qurılıs shólkemi hám “Qaraqalpaqstansuwqurılısinvest” DM basshılarına usı obektke qosımsha jumısshı kúshin hám arnawlı texnikalardı tartıp, “Eski Keneges” kanalın betonlaw jumısların 10-noyabrge shekem juwmaqlaw boyınsha tapsırma berildi.
Sonday-aq, “Eski Keneges” kanalı átirapındaǵı qorǵaw aymaǵında “Jasıl mákan” joybarı sheńberinde miyweli hám sayamanlı terek nállerin egiw zárúr ekenligi atap ótildi. Ulıwma etip aytqanda, rekonstrukciyalanıp atırǵan barlıq kanallar átirapındaǵı qorǵaw aymaqlarına terek nállerin egiw wazıypası tapsırıldı.
Gezektegi mánzil Taxtakópir rayonındaǵı “Quwanısh jarma” kanalında qurılıp atırǵan zamanagóy nasos stanciyası boldı.
Bul obektte Ózbekstan Respublikası Prezidentiniń 2024-jıl 24-dekabrdegi 454-sanlı qararına tiykarlanıp qurılıs jumısları alıp barılıp atırǵan bolıp, joybardıń ulıwma bahası 5 mlrd 296 mln sumdı quraydı. Nasos stanciyası ushın zamanagóy 8 dana suw shıǵarıw agregatları, 75 kV quwatlılıqqa ie quyash panelleri qurılmaqta. Bul quyash panelleri nasos stanciyasında elektr energiyasın únemlew imkaniyatın beredi.
Qurılıs jumısları juwmaqlanǵannan soń rayondaǵı “Ózbekstan,” “Qaraoy” máhálleleri, sonday-aq, “Ata kól” máhállesiniń ayırım aymaqlarında egislik maydanlarınıń suw támiynatı jaqsılanadı hám xalıqtıń qıytaq jerden dáramat alıw imkaniyatları keńeedi.
Ministr Sh.Xamraev Taxtakópir rayonındaǵı “Quwanısh jarma” kanalınıń 697-piketindegi gidrotexnikalıq imarattıń rekonstrukciya jumısların da barıp kórdi hám juwapkerlerge qurılıs jumısların jedellestiriw boyınsha zárúr tapsırmalardı berdi.
“Quwanısh jarma” kanalındaǵı usı gidrotexnikalıq qurılma 1977-jılı paydalanıwǵa tapsırılǵan bolıp, ońlawǵa mútáj halǵa kelip qalǵan edi. Rekonstrukciya jumısları sheńberinde bas jumıstı bólip alıp islewshi “Voris China” JShJ qospa kárxanası tárepinen gidrotexnikalıq imarattıń kiriw hám shıǵıw bólimlerine beton tósew jumısları alıp barılmaqta. Bul jumıslardı usı jıldıń 10-noyabr sánesine shekem juwmaqlap, paydalanıwǵa tapsırıw haqqında kórsetpe berildi.
Házirgi waqıtta obektte 2 dana ekskavator, 2 dana mikser, 2 dana basqa texnika hám 20 jumısshı-xızmetkerler islep atırǵan bolıp, juwapkerler jumısshı kúshin hám texnikalardı kóbeytip, wazıypanı belgilengen múddette orınlawǵa wáde berdi.
Ǵ.Atajanov,
Qaraqalpaqstan Respublikası Suw xojalıǵı ministrliginiń baspasóz xatkeri