Hámmemizge belgili, Prezidentimiz usı jıldıń 16-sentyabrinde Namangan wálayatına saparı sheńberinde Chartaq rayonındaǵı “Ayqıran-1” nasos stanciyasın kózden ótkerip, eki jıl ishinde usı nasos stanciyası tájiriybesi tiykarında wálayattaǵı barlıq nasos stanciyaların modernizaciyalaw, onı mámlekettiń basqa da aymaqlarında basqıshpa-basqısh ámelge asırıw boyınsha tapsırma bergen edi.
Házirgi kúnlerde mámleketimizde, sonıń ishinde Qaraqalpaqstannıń rayonlarında da Suw xojalıǵı ministrligi qaramaǵındaǵı nasos stanciyaların mámleketlik-jeke menshik sheriklik shártleri tiykarında baslawshılarǵa basqarıwǵa beriwdiń abzallıqları jáne tártip-qaǵıydaların túsindiriw boyınsha óz aldına seminar-treningler shólkemlestirilmekte.
Qaraqalpaqstan Respublikasınıń Taqıyatas, Xojeli, Shomanay, Qońırat hám Moynaq rayonlarında “ShARTAQ TÁJIRIYBESI” tiykarında nasos stanciyaları hám suwǵarıw tarmaqların mámleketlik-jeke menshik sheriklik tiykarında basqarıwǵa beriwdiń mazmun-mánisi, abzallıqları jáne tártip hám shártlerin túsindiriw boyınsha seminar-treningler shólkemlestirildi.
Seminarlarǵa Qaraqalpaqstan Respublikası Suw xojalıǵı ministri B.YUsupov, Qaraqalpaqstan Respublikası Joqarǵı Keńesiniń Agrar, suw xojalıǵı, tábiyattı qorǵaw hám ekologiya máseleleri komiteti baslıǵınıń orınbasarı M.Abdirov, Taqıyatas rayonınıń hákimi K.Aytbaev, Shomanay rayonınıń hákimi A.Ametov, Xojeli hám Qońırat rayonları hákimleriniń orınbasarları, Qaraqalpaqstan Respublikası Ekonomika hám qarjı ministrligi bólim baslıǵı A.Qosbergenov, “Agro bank” aymaqlıq filialınıń juwapker xızmetkerleri, “Suw jetkerip beriw xızmeti” mámleketlik mákemesiniń basshıları, Nasos stanciyaları hám energetika basqarmasınıń MJShǵa juwapkerleri, klaster, fermer hám diyqan xojalıqlarınıń basshıları hám suwshı-mıraplar qatnastı.
Ilajlarda atap ótilgenindey, Ózbekstan Respublikası Prezidentiniń 2025-jıl 14-oktyabrdegi “Tómengi buwında suw resursların basqarıw sistemasın bunnan bılay da jetilistiriw hám tarawdıń jeke menshik sektor ushın jeke menshik sektor ushın tartımlılıǵın arttırıw ilajları haqqında”ǵı qararınıń 8-bántinde “Suw xojalıǵı ministrligi, Ekonomika hám qarjı ministrligi, “Tashkent irrigaciya hám awıl xojalıǵın mexanizaciyalaw injenerleri institutı” milliy izertlew universiteti, “Agrobank” AKB menen birgelikte 2025-jıl 1-noyabrden baslap suw xojalıǵı tarawı, diyqan hám fermer xojalıqları wákillerine “Shartaq tájiriybesi” tiykarında nasos stanciyaları hám suwǵarıw tarmaqların mámleketlik-jeke menshik sheriklik tiykarında basqarıwǵa beriwdiń mazmun-mánisi, abzallıqları jáne tártip hám shártlerin túsindiriw boyınsha óz aldına reje-grafik tiykarında seminar-treningler shólkemlestirip barıw tapsırması berilgen.
Ótkerilgen seminar-treninglerde Qaraqalpaqstan Respublikası Suw xojalıǵı ministrliginiń MJSh sektor baslıǵı E.Davletiyarov, Qaraqalpaqstan nasos stanciyaları hám energetika basqarmasınıń baslıǵı N.Aralbaev hám basqa da juwapkerler tárepinen suw resursların basqarıwda “Chortoq tájiriybesi” tiykarında nasos stanciyaları hám suwǵarıw tarmaqların “bir nasos-bir sistema” principi tiykarında MJSh tiykarında basqarıwǵa beriw, yaǵnıy, suwdan paydalanıwshılarǵa suwdı tikkeley jeke menshik sherikler tárepinen jetkerip beriw sisteması haqqında tayarlanǵan prezentaciyalar arqalı hár tárepleme túsindirildi.
Maǵlıwmat ornında aytıw kerek, “Shartaq tájiriybesi” sheńberinde nasos stanciyaları hám suwǵarıw tarmaqları suwǵarıw ushın biriktirilgen maydanlarda bir suw tutınıwshısı bolsa, burınǵısınan basqasha tárizde onıń ózine, bir neshe suw tutınıwshıları bolsa, kelisilgen halda olardan birewine JShJ tiykarında basqarıwǵa beriledi. Suwdı real waqıt rejiminde ólshew qurılmaları arqalı esaplanǵan suw salıǵı túsiminiń 40 procenti suw jetkerip beriw xızmetleri tárepinen jeke menshik sherikke tólep beriletuǵını haqqında túsinikler berildi.
Sonday-aq, suw xojalıǵı obektlerin MJSh tiykarında basqarıwǵa alǵan jeke menshik sherikke belgilengen tártipte suw alıw limiti sheńberinde tutınıwshılardı suw menen támiyinlew, suw xojalıǵı obektlerin mámleketlik sherik penen kelisilgen halda basqarıw, suw esabı hám esabatınıń tolıq júrgiziliwin támiyinlew, xızmet kórsetiw aymaǵındaǵı barlıq suw xojalıǵı obektlerin basqıshpa-basqısh modernizaciyalaw minnetlemeleri júkletiletuǵını haqqında da maǵlıwmatlar berildi.
Usı rayonlarda ótkerilgen seminarlarda Qaraqalpaqstan Respublikası Suw xojalıǵı ministriniń birinshi orınbasarı A.Urazımbetov, Ózbekstan Respublikası Suw xojalıǵı ministrliginiń juwaplı xızmetkeri N.Xudayberdiev hám basqa da juwapkerler tárepinen rayonlarda suwdı únemlewshi texnologiyalardı keńnen engiziw máseleleri de keń túrde dodalandı. Bul baǵdarda ámelge asırılatuǵın wazıypalar belgilep alındı.
Qaraqalpaqstan Respublikası
Suw xojalıǵı ministrligi baspasóz xızmeti