Nókis qalasındaǵı Atchopar maydanında Awıl xojalıǵı xızmetkerleri kúnine baǵıshlanıp saltanatlı bayram tamashaları bolıp ótti.

Ilajdıń ashılıw máresiminde Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, jıynalǵanlardı Awıl xojalıǵı xızmetkerleri kúni bayramı menen qutlıqladı.

Joqarǵı Keńes Baslıǵı óz sózinde búgingi kúnde elimizde awıl xojalıǵın modernizaciyalaw, tarawǵa jańa texnika hám innovaciyalıq texnologiyalardı engiziw, jer-suw resurslarınan nátiyjeli paydalanıwdı ǵalaba en jaydırıw, xalıqtı sapalı azıq-awqat ónimleri menen támiyinlew, fermer hám klasterlerdi qollap-quwatlaw boyınsha alıp barılıp atırǵan keń kólemli jumıslarǵa toqtap ótti.

 Bayram ilajında Ózbekstan Respublikası Suw xojalıǵı ministri Sh.Xamraev qatnasıp, jıynalǵanlardı “Zúráát bayramı” menen qutlıqladı Qaraqalpaqstanda suw xojalıǵı tarawında ámelge asırılıp atırǵan reformalar keyingi jıllarda da izbe-iz dawam ettiriletuǵının atap ótti.

Bayram saltanatında elimizde agrar tarawda nátiyjeli jumıs alıp barıp atırǵan bir qatar miynet aldınǵıları, sonıń ishinde, suwshı irrigatorlar da xoshametlendi.

– Bıyılǵı Awıl xojalıǵı xızmetkerleri kúni – “Zúráát bayramı”nda suwshılardıń miynetleri ayrıqsha atap ótilmekte, – deydi Kegeyli rayonı “Suw jetkerip beriw xızmeti” mámleketlik mákemesi direktorınıń orınbasarı Tashkentbay Saparbaev. – Mine búgingi bayramda meniń alıs awıllarǵa suw jetkeriw boyınsha alıp barǵan xızmetlerim “Eń jaqsı irrigator” sıpatında tán alınıp, SKUTER menen sıylıqlandım. Álbette, bul tán alıw pútkil toparımızǵa berilgen baha hám aldaǵı jumıslarımızǵa kúsh-ǵayrat baǵıshlaydı.

Bir sóz benen aytqanda, “Zúráát bayramı”ndaǵı tán alıw hám sıylıqlar suwshılardı jańasha kúsh-ǵayrat penen islewge ruwxlandırmaqta.

Álbette, “Zúráát bayramı”ndaǵı tán alıw hám sıylıqlar suwshılardı jańasha kúsh-ǵayrat penen islewge ruwxlandırmaqta.

Qaraqalpaqstan Respublikası

Suw xojalıǵı ministrligi Baspasóz xızmeti