Assalawma aleykum!
Húrmetli suw xojalıǵı xızmetkerleri!
Mine, 2025-jıl juwmaqlanıp, bárshemiz jańa arzıwlar, úlken-úlken rejeler menen Jańa – 2026-jıldı kútip almaqdamız.
Bir neshe kún aldın Húrmetli Prezidentimiz Oliy Majliske hám kóp milletli xalqımızǵa kelesi Múrájatında da suwdan aqılǵa uǵras paydalanıw mámleketlik siyasat dárejesine alıp shıǵılǵanı tán alındı. 2025-jılı 2 million 300 mıńǵa shamalas xalıqtıń suw támiynatı jaqsılanǵanı yamasa 867 máhálledegi 470 mıń shańaraqqa qıytaq jerlerdi suwǵarıw ushın birinshi márte suw jetip barǵanı atap ótildi.
Bul baǵdarda Qaraqalpaqstan Respublikasında da keń kólemli jumıslar nátiyjesinde suw támiynatı awır bolǵan 40 tan aslam aymaqlarǵa suw jetkerip berildi. Sonday-aq, “Kámbaǵallıqtan abadanlıqqa qaray” baǵdarlamasına bola, 89 joybar sheńberinde 857,2 km kanallar, 37 suwǵarıw qudıǵı, 207 nasos agregatı hám 85,5 km basımlı qubırlardı qurıw hám rekonstrukciyalaw jumısları orınlandı. Nátiyjede 68 270 shańaraqta jasaytuǵın xalıqtıń 10,98 mıń gektar qıytaq jerinde suw támiynatınıń jaqsılanıwına erisildi.
Húrmetli suwshılar!
2026-jılı suwdı únemleytuǵın texnologiyalardı engiziw, kanallardı rekonstrukciyalaw, gidrotexnikalıq obektti hám gidroposttı ońlaw, alınıp atırǵan suw muǵdarın real waqıt rejiminde baqlaw imkaniyatın jaratatuǵın sanlı suw ólshew qurılmaların ornatıw baǵdarında rejelerimizdi belgilep aldıq.
Suw xojalıǵınıń barlıq buwındaǵı xızmetkerler kelesi jılı da aldımızǵa qoyılǵan rejelerdi orınlawda pidákerlik penen miynet etedi, dep isenemen.
Suwshılar “Ómir dáregi”ne teńlestiriletuǵın eń tiykarǵı hám áhmietli jemis bolǵan suwdı aymaqlarǵa jetkeriw jumısı menen shuǵıllanadı. Islam dininde hám shıǵıs filosofiyasında shóldi qandırıw, eginlerge suw beriw eń úlken sawaplardan esaplanadı. Usı kózqarastan húrmetli suwshılar Siz sawaplı kásip ieleri esaplanasız.
Pursattan paydalanıp, Sizlerdi hám sizler arqalı pútkil xalqımızdı kirip kiyatırǵan Jańa jıl bayramı menen qutlıqlayman jáne barlıq shańaraqlarǵa baxıt-ıǵbal hám bekkem densawlıq tileymen!
Kirip kiyatırǵan 2026-jılda suw mol bolıwın Jaratqannan soraymız.
Jańa jıl múbárek bolsın!
Qaraqalpaqstan Respublikası
Suw xojalıǵı ministri B.Yusupov
2025-jıl 31-dekabr