Qaraqalpaqstan Respublikası Ámiwdárya rayonındaǵı “Aq-altın” APJ aymaǵında jaylasqan “YAkubova Gavkar” fermer xojalıǵı atızında taraw qánigeleriniń qatnasıwında ámeliy seminar bolıp ótti. Ilajda suw resurslarınan aqılǵa uǵras paydalanıw, jerlerdiń meliorativlik jaǵdayın jaqsılaw hám salıq nızamshılıǵındaǵı jańalıqlar dodalandı.
Seminarǵa Qaraqalpaqstan Respublikası Joqarǵı Keńesi, Ministrler Keńesi, Awıl hám Suw xojalıǵı ministrlikleri, Meliorativ ekspediciya juwapkerleri, ilimpazlar, fermerler hám basqa da suw tutınıwshıları qatnastı.
Ilajda Qaraqalpaqstan Respublikası Suw xojalıǵı ministri B.Yusupov shıǵıp sóylep, suw tamtarıslıǵı sharayatında shor juwıw jumısların sapalı shólkemlestiriw zárúrligin atap ótti. Atap aytqanda, jerlerdi 35-40 sm tereńlikte súriw, keminde 3 jılda bir márte lazerli tegislew hám maydandı qıyalıǵına qarap pollarǵa bóliw tiykarǵı talap etip belgilendi.
Sonday-aq, seminarda suwdan paydalanıw qaǵıydaların buzǵanlıq ushın qollanılatuǵın ekonomikalıq sharalar esletip ótildi. Maǵlıwmat beriliwinshe, suw esabın júrgizbegenler ushın salıq bazası 2 esege arttırıladı. Únemli texnologiyalar hám suw ólshew úskeneleri ornatılmaǵan jaǵdayda 1,1 koefficienti qollanıladı. Limitten artıqsha suw alınǵanda yamasa ruqsacız paydalanǵanda salıq stavkası 5 ese muǵdarında belgilenedi.
Qaraqalpaqstan Respublikası Suw xojalıǵı ministrligi janındaǵı meliorativlik ekspediciya baslıǵı I.Janabaev shıǵıp sóylep, egislik jerlerde shor juwıw ilajların Ózbekstan Respublikası Ministrler Kabinetiniń 2021-jıl 8-apreldegi “Awıl xojalıǵına mólsherlengen jerlerdiń shorın juwıw jumısların shólkemlestiriw boyınsha qosımsha ilajlar haqqında”ǵı qararı talapları tiykarında ámelge asırılıwı zárúrligin bildirdi.
Rayon juwapkerleri rayonda bıyılǵı máwsimde shor juwıw ilajları ótkeriletuǵın maydanlar haqqında maǵlıwmat berdi. Málim etiliwinshe, Ámiwdárya rayonında usı gúz-qıs máwsiminde jámi 20 mıń 160 gektar maydanda shor juwıw jumısları rejelestirilgen. Sonnan 836 gektarı kúshli, 9 101 gektarı ortasha hám 10 224 gektarı az shorlanǵan maydanlar bolıp tabıladı.
Seminarda Irrigaciya hám suw mashqalaları ilimiy-izertlew institutı Qaraqalpaqstan aymaqlıq orayınıń direktorı S.Qurbanbaev shıǵıp sóylep, shor juwıw jumısların ámelge asırıwdan aldın ilimiy-izertlew institutları tárepinen islep shıǵılǵan usınıslar tiykarında jerlerdi shor juwıwǵa tayarlaw hámde shor juwıw jumısların belgilengen normalar tiykarında ámelge asırıw zárúrligin ayrıqsha atap ótti.
Kórgizbeli seminarda shor juwıwda innovaciyalıq sheshimler boyınsha da maǵlıwmatlar berildi. Topıraqtaǵı duzlardıń juwılıwın tezletiw maqsetinde “Biosolvent” biopreparatınan paydalanıw usınıs etildi. Qánigelerdiń atap ótiwinshe, bul qural qıyın eriytuǵın duzlardı tarqatadı, shor juwıw ushın jumsalatuǵın suw kólemin sezilerli dárejede azaytadı.
Seminar juwmaǵında qánigeler tárepinen fermer hám klasterlerge shor juwıw jumısların ilimiy usınıslar tiykarında ótkeriw boyınsha kórsetpeler berildi.
Qaraqalpaqstan Respublikası
Suw xojalıǵı ministrligi baspasóz xızmeti