Taqıyatas rayonındaǵı “Ámiwdárya” TMXB Tómengi dárya basqarmasına qaraslı Taqıyatas gidrouzeli imaratında suwdan nátiyjeli paydalanıw hám gidrotexnikalıq qurılmalardıń apachılıqsız islewi hám qáwipsizligin támiyinlew boyınsha seminar bolıp ótti.

Seminarda “Suwxojalıqnazorat” inspekciyası baslıǵınıń orınbasarı Z.Irisbaev shıǵıp sóylep, gidroobektlerdiń texnikalıq jaǵdayı, qáwipsizligin támiyinlewge baylanıslı nızam hám húkimet qararlarınıń áhmieti hám olardı ámeliyatqa nátiyjeli engiziw boyınsha tolıq túsinikler berdi.

Atap aytqanda, Ózbekstan Respublikasınıń 2023-jıl 30-avgusttaǵı “Gidrotexnika obektleriniń qáwipsizligi haqqında”ǵı 865-sanlı Nızamı, Ministrler Kabinetiniń 2023-jıl 27-sentyabrdegi 500-sanlı qararı, Ministrler Kabinetiniń 2024-jıl 30-iyuldegi 457-sanlı qararlarınıń mazmun-mánisi keńnen túsindirildi.

Seminarda gidrotexnikalıq obektlerdiń texnikalıq jaǵdayın jaqsılaw boyınsha ilajlar rejesin islep shıǵıw hám turaqlı túrde orınlanıwın monitoring etip barıw belgilendi. Sonday-aq, Taqıyatas gidrotexnikalıq kompleksiniń Qáwipsizlik deklaraciyasın islep shıǵıp 2026-jıldıń III shereginde ekspertizadan ótkeriw hám Taqıyatas gidrouzeliniń shep hám oń jaǵalıq gidrotexnikalıq qurılmasınıń shógiw hám jıljıw ólshewlerin ótkeriw ushın 2026-jıl qárejetler smetasına qarjı kirgiziw boyınsha wazıypalar belgilep alındı.

Seminarǵa Qaraqalpaqstan Respublikası Suw xojalıǵı ministriniń birinshi orınbasarı A.Urazımbetov qatnastı.

Qaraqalpaqstan Respublikası

Suw xojalıǵı ministrligi baspasóz xızmeti