Qaraqalpaqstan Respublikası Suw xojalıǵı ministrliginde suwdan maqsetli paydalanıw, shor juwıw jumısların shólkemlestiriw hám tarawda ámelge asırılıp atırǵan jumıslar hám reje kórsetkishleriniń orınlanıwı boyınsha sın kózqarastan tallaw májilisi ótkerildi.
Videoselektor tárizinde shólkemlestirilgen májiliste “Suwxojalıqnazorat” inspekciyasınıń baslıǵı R.Raximov, sonday-aq, aymaqlıq studiyalar arqalı Qaraqalpaqstan Respublikasındaǵı barlıq suw xojalıǵı shólkemleriniń basshıları, bas esapshıları hám juwapker xızmetkerleri qatnastı.
Májiliste Qaraqalpaqstan Respublikası Suw xojalıǵı ministri B.YUsupov Beruniy rayonındaǵı studiyadan qatnasıp, kún tártibindegi máselelerdi hár tárepleme talqıladı hám bar kemshiliklerdi saplastırıw hám belgilengen wazıypalardı óz waqtında orınlaw boyınsha anıq tapsırmalar berdi.
Atap aytqanda, “Suw esabı” málimleme platforması sheńberinde suwdan paydalanıw shártnamaların tolıq rásmiylestiriw, suw jetip barıwı qıyın bolǵan aymaqlar dizimin qáliplestiriw hám tastıyıqlaw jáne usı aymaqlarda suw támiynatın jaqsılaw boyınsha usınıslar dodalandı.
Májiliste suw resurslarınan nátiyjeli hám maqsetli paydalanıw, suw esabın durıs júrgiziw, suw xojalıǵı obektleriniń kadastr hújjetlerin rásmiylestiriw hám sanlastırıw, rawajlandırıw qorına qarjı túsiriw jáne suwǵarıw tarmaqlarında alıp barılıp atırǵan qazıp-tazalaw jumısların belgilengen múddetlerde juwmaqlaw máselelerine ayrıqsha itibar qaratıldı.
Házirgi waqıtta rayonlarda dawam etip atırǵan shor juwıw jumısların suw resurslarınan nátiyjeli paydalanǵan halda durıs shólkemlestiriw, processti sistemalı túrde tallap barıw hám bul baǵdarda suwdan paydalanıwshılar menen birge islesiwdi kúsheytiw máselelerine ayrıqsha itibar qaratıldı.
Bunnan tısqarı, úlgi suw ólshew orınların shólkemlestiriw, sonıń ishinde, gidropostlar, “Aqıllı suw” hám “Aqıllı jap” sistemaların engiziw máseleleri de dodalandı.
Sonday-aq, májiliste elimizde 13 hám 14-mart kúnleri ulıwmaxalıqlıq qayırqomlıq shembilik ótkeriletuǵını belgilengenin esapqa alıp, aymaqlarda abadanlastırıw jumısların kúsheytiw, 2026-jıl báhár máwsiminde nál egiw ilajların shólkemlestiriw, suwdı únemleytuǵın texnologiyalardı engiziw, ishki kanallarda betonlastırıw jumısların ámelge asırıw, eskirgen nasos agregatların energiyanı únemleytuǵın úskenelerge almastırıw hám nasos stanciyalarına quyash panellerin ornatıw jumısların jedellestiriw boyınsha da tiyisli wazıypalar belgilep berildi.
Qaraqalpaqstan Respublikası
Suw xojalıǵı ministrligi baspasóz xızmeti