Usı kúnlerde Qaraqalpaqstan Respublikası rayonlarında awıl xojalıǵı eginleri egilgen maydanlarda shor juwıw ilajları shólkemleskenlik penen dawam etpekte. Atap aytqanda, Ámiwdárya rayonında paxta egiletuǵın maydanlarda shor juwıw jumısları tolıq orınlanǵan bolsa, Taxtakópir, Ellikqala rayonlarında tez kúnlerde juwmaqlanıwı kútilmekte. Qalǵan aymaqlarda da bul jumıslar jedel pátlerde alıp barılmaqta.
Barlıq aymaqlarda suw resurslarınan nátiyjeli paydalanıw, suwdı awır aymaqlarǵa jetkerip beriw, xalıqtıń qıytaq jerleri jáne ǵálle maydanların báhárgi suw menen támiyinlew jumısları sistemalı túrde shólkemlestirilmekte. Bul processler Suw xojalıǵı ministrligi juwapkerleriniń quramında dúzilgen jumısshı topar tárepinen kúnlik qadaǵalawǵa alınǵan. Sonday-aq, shor juwıw jumıslarında artta qalıp atırǵan aymaqlarda jaǵday ornına shıqqan halda úyrenilip, ámeliy ilajlar kórilmekte.
Sonıń ishinde, “Suwxojalıqnazorat” inspekciyası baslıǵınıń orınbasarı Zafar Irisbaev hám Qaraqalpaqstan Respublikası Suw xojalıǵı ministriniń orınbasarı Tajetdin Madireymov Shımbay rayonında bolıp, shor juwıw ilajları hám ǵálle maydanlarına báhárgi suw beriw jumıslarınıń barısın úyrendi.
Tallawlarǵa bola, respublika boyınsha paxta maydanlarında shor juwıw jumısları 82 procentten asqan bir waqıtta, Shımbay rayonında bul kórsetkish tek ǵana 63 procentti quramaqta. Usı múnásibet penen rayon bul baǵdarda artta qalıp atırǵan aymaq sıpatında sınǵa alınıp, juwapkerlerge anıq tapsırmalar berildi.
Úyreniw dawamında rayondaǵı “Mayjap” kanalında suw ólshew jumısları ámelge asırıldı. Rayonlıq “Suw jetkerip beriw xızmeti” mámleketlik mákemesi baslıǵı tárepinen kanallardaǵı suw bólistiriliwi boyınsha maǵlıwmat berildi. Sonday-aq, juwapkerler “Kegeyli,” “Besjap” hám “Shaqarıq” kanallarında bolıp, suwdan nátiyjeli paydalanıw hám shor juwıw jumısların jedellestiriw boyınsha tiyisli kórsetpeler berdi.
Usı kúni “Qızıl ózek” awıl puqaralar jıyını aymaǵında shor juwıw hám biyday atızların suwǵarıw, sonday-aq, kanallar átirapın abadanlastırıw jumısların kúsheytiw maqsetinde “hámsher” shólkemlestirildi. Onda qatnasqan suwshılar dala sharayatında ıssı awqat penen támiyinlendi hám jumıslardı sistemalı shólkemlestiriw boyınsha zárúr ilajlar kórildi.
Qaraqalpaqstan Respublikası
Suw xojalıǵı ministrligi baspasóz xızmeti