Bozataw rayonında sońǵı jılları xalıqtıń turmıs sharayatın jaqsılaw, injenerlik-kommunikaciya infrastrukturasın rawajlandırıwǵa qaratılǵan keń kólemli jumıslar ámelge asırılıp, kóplegen jańa obektler qurılıp paydalanıwǵa tapsırılmaqta. Mine usınday áhmietli joybarlardan biri sıpatında búgin rayonda suw támiynatın jáne de jaqsılawǵa xızmet etetuǵın zamanagóy nasos stanciyasınıń saltanatlı túrde iske qosılıwı ayrıqsha áhmietke ie.
Ózbekstan Respublikası Prezidentiniń 2020-jıl 5-dekabrdegi PQ-4912-sanlı qararına muwapıq, Ámiwdáryanıń Bozataw rayonı aymaǵınan ótetuǵın bóliminde quwatlılıǵı 3 m3/sek bolǵan NDN-24 nasos agregatların ornatıw joybarı mámleketlik baǵdarlamalarǵa kirgizilip, “Voris China” juwapkershiligi sheklengen jámieti tárepinen qurılıs jumısları tolıq juwmaqlandı.
Búgin jańadan qurılǵan zamanagóy nasos stanciyasınıń saltanatlı ashılıw máresimi bolıp ótti. Ilajda Suw xojalıǵı ministrligi, rayon hákimliginiń juwapkerleri, nuraniylar, fermerler hám máhálle belsendileri qatnastı.
Ilajda Bozataw rayonı hákimi B.Ubbiniyazov, “Suwxojalıqnazorat” inspekciyası baslıǵınıń orınbasarı Z.Irisbaev, Tashkent irrigaciya hám awıl xojalıǵın mexanizaciyalaw injenerleri institutınıń docenti A.Xalimbetov, Qaraqalpaqstan Respublikası suw xojalıǵı ministriniń orınbasarı T.Madireymov, “Qaraqalpaqstansuwqurılısinvest” mámleketlik inspekciyasınıń direktorı wazıypasın atqarıwshı A.Saparbaevlar qatnastı. A.Kaypov hám basqa da juwapkerler qatnasıp, shıǵıp sóyledi.
Atap ótilgenindey, ilaj dawamında bul joybar aymaq infrastrukturasın bunnan bılay da rawajlandırıw, sanitariyalıq jaǵdaydı jaqsılaw hám xalıq ushın qolaylı jasaw sharayatların jaratıwda áhmietli orın ieleytuǵını atap ótildi.
Joybar sheńberinde NDN-24 nasos agregatlarınıń ornatılıwı nátiyjesinde rayondaǵı 1,5 mıń xalıqtıń 210 gektar qıytaq jer maydanları, 2,8 mıń gektar suwǵarılatuǵın jerler hám 3,5 mıń gektar jaylaw maydanların suw menen támiyinlew imkaniyatı jáne de jaqsılanadı.
Bul jumıslarǵa qurılıs basınan jámi 13 mlrd 223 mln sum qarjı jumsaldı. Házirgi waqıtta Qaraqalpaqstan nasos stanciyaları hám energetika basqarması tárepinen agregatlar saz jaǵdayda saqlanıp, aymaqtıń suwǵa bolǵan talabın támiyinlewge xızmet etpekte.
Ilaj sońında simvolikalıq lenta kesilip, nuranıylardıń pátiyası menen nasos agregatları iske qosıldı hám qatnasıwshılar jańadan qurılǵan nasos stanciyasınıń jumısı menen jaqınnan tanıstı.
Juwmaq ornında aytqanda, bunday joybarlar Bozataw rayonınıń sociallıq-ekonomikalıq rawajlanıwına kúshli túrtki berip, xalıqtıń abadanlıǵın arttırıw, awıl xojalıǵı nátiyjeliligin arttırıw hám aymaqta turaqlı suw támiynatın támiyinlewde áhmietli faktor bolıp xızmet etedi.
Qaraqalpaqstan Respublikası
Suw xojalıǵı ministrligi baspasóz xızmeti