Qaraqalpaqstan Respublikasında awıl xojalıǵında suw resurslarınan aqılǵa uǵras paydalanıw hám suwdı únemleytuǵın texnologiyalardı keńnen engiziw boyınsha izbe-iz jumıslar ámelge asırılmaqta.
– Qanlıkól rayonında da suwdı únemleytuǵın texnologiyalardı keńnen engiziw jumısları dawam etpekte,-deydi Qanlıkól rayonı “Suw jetkerip beriw xızmeti” DM direktorı Asqar Sarsenbaev. – Usı jılı rayonda 85 gektar paxta maydanlarında 4 komplekt iyiliwsheń qubır arqalı suwǵarıw texnologiyasın engiziw rejelestirilgen. Házirgi waqıtta “Bostan” máhállesindegi “Tawmurat biy” fermer xojalıǵında bir komplekt iyiliwsheń qubır ornatılıp, paxta maydanların usı texnologiya tiykarında suwǵarıw jumısları nátiyjeli shólkemlestirilmekte.
Ǵawasha maydanlarında suwdı únemleytuǵın texnologiyalardı qollanıw jumısları Beruniy rayonında da izbe-iz alıp barılmaqta. Rayondaǵı Abay awıl puqaralar jıyını aymaǵında jaylasqan “Nurulla Agronom” fermer xojalıǵında “Kavsar” texnologiyası tiykarında 20 gektar maydan suwǵarılıp, nátiyjede suwdıń jumsalıwı 40 procentke shekem qısqartıldı.
Sonday-aq, Taqıyatas rayonındaǵı Naymankól awıl puqaralar jıyını aymaǵında jumıs alıp barıp atırǵan “Sadullaev Jamshid” fermer xojalıǵında da alıp barılmaqta. Bul jerde paxta maydanları iyiliwsheń qubırlar járdeminde suwǵarılıp, suw resurslarınan únemli paydalanılmaqta.
Shımbay rayonındaǵı “Xudaybergen Guldana” fermer xojalıǵında da paxta maydanların iyiliwsheń qubırlar arqalı suwǵarıw jumısları jolǵa qoyılǵan.
Iyiliwsheń qubır hám basqa da suwdı únemleytuǵın texnologiyalardıń engiziliwi suwdıń jumsalıwın 30-50 procentke shekem azaytıw, ósimliklerdi suw menen normada támiyinlew, zúráátlilikti arttırıw, topıraq eroziyası hám shorlanıw qáwpin azaytıw, tóginlerden nátiyjeli paydalanıw, sonday-aq, miynet hám energiya jumsalıwın qısqartıw imkaniyatın bermekte.
Qánigelerdiń atap ótiwinshe, suw resursları sheklengen Qaraqalpaqstan sharayatında bunday zamanagóy texnologiyalardı keńnen engiziw suwdan nátiyjeli paydalanıw, awıl xojalıǵı óndirisiniń turaqlılıǵın támiyinlew hám joqarı zúráát alıwda úlken áhmietke ie.
Qaraqalpaqstan Respublikası
Suw xojalıǵı ministrligi baspasóz xızmeti