Qońırat rayonındaǵı “Agro Fayz” fermer xojalıǵında iyiliwsheń qubırlar járdeminde suwǵarıw texnologiyasın engiziwge baǵıshlanǵan kórgizbeli seminar ótkerildi.

Seminarǵa Qaraqalpaqstan Respublikası Suw xojalıǵı ministriniń birinshi orınbasarı R.Allabergenov, “Suenli” irrigaciya sistemaları basqarmasınıń direktorı Z.Ibragimov, Qońırat rayonı “Suw jetkerip beriw xızmeti” mámleketlik mákemesiniń direktorı N.Tureev, sonday-aq, Tazabirlik aymaǵındaǵı fermer xojalıqlarınıń basshıları hám rayonlıq “Suw jetkerip beriw xızmeti” mámleketlik mákemesiniń xızmetkerleri qatnastı.

Seminar dawamında iyiliwsheń qubırlar járdeminde suwǵarıw texnologiyasınıń abzallıqları haqqında hár tárepleme maǵlıwmat berildi. Atap aytqanda, usı texnologiyanı qollanıw arqalı suw resursların únemlew, suwdan nátiyjeli paydalanıw, qarıqlarǵa suwdıń bir tegis bólistiriliwi, barlıq qarıqlardıń bir waqıttıń ózinde tolıwı, suwdıń filtraciya hám puwlanıw arqalı shıǵınıwınıń aldın alıw múmkin ekenligi atap ótildi.

Sonday-aq, qatnasıwshılarǵa suwdı únemleytuǵın texnologiyalardıń basqa túrleri, olardıń awıl xojalıǵındaǵı áhmieti hám ekonomikalıq nátiyjeliligi haqqında da túsinikler berildi. Atap ótilgenindey, suwdı únemleytuǵın texnologiyalardı qollanıw nátiyjesinde suwdıń jumsalıwın 30-50 procentke shekem azaytıw imkaniyatı bar. Bunnan tısqarı, usı texnologiyalardı engizetuǵın awıl xojalıǵı islep shıǵarıwshılarına mámleket tárepinen jeńilletilgen kreditler, subsidiyalar jáne suw hám jer salıǵı boyınsha belgilengen jeńillikler beriletuǵını haqqında maǵlıwmat berildi.

Seminar juwmaǵında fermer xojalıqları basshıları tárepinen berilgen sorawlarǵa taraw qánigeleri tárepinen tolıq juwaplar berildi. Bunday seminarlar basqa rayonlarda da ótkerilmekte.

Qaraqalpaqstan Respublikası

Suw xojalıǵı ministrligi baspasóz xızmeti