Shımbay rayonındaǵı “Taǵ-jap” kanalı rekonstrukciya jumıslarınan soń saltanatlı túrde paydalanıwǵa tapsırıldı.
Ilajda Shımbay rayonı hákimi N.Eshanov, Qaraqalpaqstan Respublikası Suw xojalıǵı ministri B.Yusupov, awıl hám suw xojalıǵı tarawınıń juwapkerleri, nuraniylar, qurılıs shólkemleriniń wákilleri hám jámiechilik belsendileri qatnastı.
1938-jılı paydalanıwǵa tapsırılǵan “Taw-jap” kanalınıń ulıwma uzınlıǵı 13,3 kilometrdi qurap, kanal arqalı 4 136 gektar egislik maydanların suw menen támiyinlew imkaniyatı bar. Kanalda 45 gidrotexnikalıq qurılma jaylasqan.
Uzaq jıllar dawamında paydalanıw nátiyjesinde kanaldıń ayırım bólimlerinde joybarlaw parametrleri ózgerip, suw ótkeriw qábileti tómenlegen, filtraciya arqalı suw joǵaltıwlar kóbeygen edi. Gidrotexnikalıq obektlerdegi gónergen dárwazalar da suwdıń nátiyjesiz jumsalıwına sebep bolıp, jılına ortasha 2,5 million kub metr suw joǵaltılǵan.
Bul mashqalalardı saplastırıw maqsetinde Húkimet qararı tiykarında “Taw-jap” kanalınıń 13,3 kilometrlik bóleginde rekonstrukciya jumısların ámelge asırıw belgilendi. Joybar sheńberinde kanal ózegi betonlastırılıp, gidrotexnikalıq obektler ońlandı hám zamanagóy talaplarǵa sáykes keltirilgen.
Rekonstrukciya jumısları “Ellikqala arnawlısuwpudrat” JShJ tárepinen ámelge asırıldı. Joybardıń shártnama bahası 18 milliard 992 million sumdı quradı.
Nátiyjede kanaldıń paydalı jumıs koefficientin 0,90 ǵa jetkeriw, suw shıǵınların sezilerli azaytıw hám suwdı tutınıwshılarǵa kepillikli jetkerip beriw imkaniyatı jaratıldı.
Eń áhmietlisi, rekonstrukciya jumısları nátiyjesinde 16 fermer xojalıǵı hám 4 355 ten aslam xalıqtıń qıytaq jerleriniń 4 136 gektar egislik maydanların suw menen támiyinlew sharayatı jaqsılandı.
Saltanatlı ilajda kanaldı rekonstrukciyalawda qatnasqan shólkemler hám juwapker xızmetkerlerdiń miyneti ayrıqsha atap ótildi.
Shımbay rayonı hákimligi tárepinen Qaraqalpaqstan Respublikası Suw xojalıǵı ministri B.YUsupovqa, buyırtpashı hám jumıstı bólip alıp islewshi shólkemlerdiń basshılarına, sonday-aq, qurılıs-montajlaw jumıslarında belsene qatnasqan jumısshı-xızmetkerlerge minnetdarshılıq bildirilip, minnetdarshılıq xatları tapsırıldı.
Bunnan keyin ilajdıń eń saltanatlı máwritlerine náwbet berildi. Nuraniylar pátiyaǵa qol jayıp, jurt tınıshlıǵı, xalıq abadanlıǵı, suwdıń bereketin hám mol zúráát tilep pátiya etti.
Nuranıylardıń pátiyası menen “Taw-jap” kanalınıń simvolikalıq lentası kesilip, oǵan suw ashıldı. Kanal boylap háreketlene baslaǵan taza suw tek ǵana rekonstrukciya jumıslarınıń juwmaqlanǵanın emes, al mıńlaǵan gektar egislik maydanları hám xalıqtıń qıytaq jerlerine jáne de turaqlı suw jetkerip beriwdiń jańa basqıshın bildirdi.
Atap ótilgenindey, “Taw-jap” kanalınıń rekonstrukciyalanıwı suw resurslarınan nátiyjeli hám únemli paydalanıw, awıl xojalıǵı jerleriniń suw támiynatın jaqsılaw jáne fermerler hám xalıq ushın qolaylı sharayat jaratıwda úlken áhmietke ie.
Qaraqalpaqstan Respublikası
Suw xojalıǵı ministrligi baspasóz xızmeti