Insan qádirin ulıǵlaw, sociallıq qorǵawǵa mútáj xalıqtı qollap-quwatlaw hám olar ushın múnásip sharayatlar jaratıw elimizde ámelge asırılıp atırǵan reformalardıń áhmietli baǵdarlarınan biri bolıp esaplanadı.

Ózbekstan Respublikası Prezidentiniń 2024-jıl 27-fevraldaǵı “Mútáj shaxslardı protez-ortopediya úskeneleri hám reabilitaciyalawdıń texnikalıq quralları menen támiyinlew sistemasın jetilistiriw ilajları haqqında”ǵı PQ-88-sanlı qararınıń orınlanıwın támiyinlew maqsetinde Qaraqalpaqstan Respublikası Suw xojalıǵı ministrligi tárepinen de sociallıq qollap-quwatlawǵa qaratılǵan ámeliy jumıslar alıp barılmaqta.

Sonıń ishinde, Sociallıq qorǵaw milliy agentliginiń Qaraqalpaqstan Respublikası basqarması tárepinen usınılǵan maǵlıwmat tiykarında Xojeli rayonında reabilitaciyanıń texnikalıq quralına mútáj puqaralar úyrenildi.

Xojeli rayonı “Parvoz” MPJ aymaǵında jasawshı Gúlzada Djumanazarovanıń mayıplıq arbashaǵa bolǵan mútájligi esapqa alınıp, Qaraqalpaqstan Respublikası Suw xojalıǵı ministrligi tárepinen jańa arbasha satıp alındı. Ǵárezsizligimizdiń 35 jıllıǵı aldında bul reabilitaciya quralı iesine úyde tapsırıldı.

Ilajǵa Qaraqalpaqstan Respublikası Suw xojalıǵı ministriniń orınbasarı T.Madireymov hám ministrlik juwapkerleri qatnastı. Onda mámleketimizde, Prezidentimizdiń basshılıǵında, xalıqtıń sociallıq qorǵawǵa mútáj qatlamların qollap-quwatlawǵa ayrıqsha itibar qaratılıp atırǵanı, ámelge asırılıp atırǵan bunday iygilikli jumıslar bolsa insan mápi hám qádirin ústin qoyıwdıń ámeliy kórinisi ekeni atap ótildi.

Bayram aldınan kórsetilgen bunday ǵamqorlıq shańaraq ieleriniń quwanıshına quwanısh qosıp, “Insan qádiri ushın” degen iygilikli ideyanıń turmıstaǵı ámeliy kórinisi boldı.

Qaraqalpaqstan Respublikası Suw xojalıǵı ministrligi tárepinen xalıqtıń sociallıq qorǵawǵa mútáj qatlamların qollap-quwatlaw hám olardıń talaplarına itibar qaratıwǵa qaratılǵan iygilikli jumıslar izbe-iz dawam ettiriledi.

Qaraqalpaqstan Respublikası

Suw xojalıǵı ministrligi baspasóz xızmeti