Bizge belgili, Ózbekstan Respublikası Suw xojalıǵı ministrliginiń 2022-jıl 5-dekabrdegi orınlarda dodalanatuǵın máseleler hám reje kórsetkishleriniń orınlanıwın támiyinlew boyınsha seminarlar ótkeriw boyınsha tastıyıqlanǵan grafik tiykarında hár hápteniń juma kúni nasos stanciyalarında kórgizbeli seminarlar ótkerilip, belgilengen wazıypalardıń orınlanıwı úyrenip kelinbekte.
Qaraqalpaqstan nasos stanciyaları hám energetika basqarması juwapkerleriniń qatnasıwındaǵı búgingi seminar Qońırat rayonındaǵı “Rawshan-saǵa” nasos stanciyasında bolıp ótti.
– Seminar sebepli barlıq nasos stanciyalarımız úlgi jaǵdayǵa keltirilmekte, – deydi Basqarmanıń Óndirislik texnika bólimi baslıǵı Sagidulla Utemuratov. – Durısın aytqanda, bunnan eki yarım jıl burın qálegen nasos stanciyasına barıp bunday seminar ótkeriw múmkin emes edi. Sebebi, nasos stanciyaları átirapın abadanlastırıwdan baslap, ońlaw, boyaw jumısları deysiz be, bir talay kemshilikler bolıwı múmkin edi.
Ótken dáwir dawamında seminarlar sheńberinde elektr energiyasınan nátiyjeli paydalanıw, agregatların sapalı ońlaw hám qorǵaw zonalarında járdemshi xojalıqlar shólkemlestiriw boyınsha berilgen tapsırmalar búgin óz nátiyjesin kórsetpekte. Eń alıs aymaqlardaǵı nasos stanciyalarınıń xızmetkerleri de qorǵanıw zonalarınan nátiyjeli paydalanıwdı basladı. Mine búgin seminar bolıp atırǵan Qońırat rayonındaǵı bul nasostıń átirapında burın jıńǵıl ósip, jumısshılar ushın da sharayat jaqsı emes edi. Házir kórip turmız, bul jerge egilgen pomidor hám basqa da ovosh-palız eginleri pisip jetilgen. Bir sóz benen aytqanda, biz seminarlarda dodalaytuǵın ońlaw, nasos agregatları hám qubırların boyaw jumısların, sonday-aq, gónergen úskenelerdi almastırıw hám elektr energiyasınan nátiyjeli paydalanıw zárúrligin búgin ápiwayı nasosshılar da júdá jaqsı túsinip jetken.
Seminarda Basqarmanıń Miynetti qorǵaw hám texnika qáwipsizligi boyınsha bas qánigesi J.Muradov ta shıǵıp sóylep, nasos stanciyalarında elektr energiyasın únemlew, elektr dvigatellerdi turaqlı qadaǵalaw, jumısshı-xızmetkerlerdiń texnika qáwipsizligi qaǵıydalarına ámel etiwi boyınsha pikir-usınısların bildirdi.
Sonday-aq, ilajda basqarmanıń Qońırat-Moynaq bólimi baslıǵı N.Mahalovqa barlıq nasos stanciyaları átiraplarında járdemshi xojalıqlardı shólkemlestiriw, jer maydanlarınan nátiyjeli paydalanıp awıl xojalıǵı eginlerin jetistiriw hám xızmetkerlerdi qosımsha xoshametlep barıw boyınsha juwapkerler tárepinen kerekli usınıs hám tapsırmalar berildi.
Qaraqalpaqstan Respublikası
Suw xojalıǵı ministrligi baspasóz xızmeti