Nókis rayonında jaylasqan “Quwanısh-jarma” irrigaciya sistemaları basqarmasına qaraslı “Doslıq-1” gidrotexnikalıq obektinde suwdan nátiyjeli paydalanıw, gidrotexnikalıq obektlerdiń apachılıqsız islewi hám olardıń qáwipsizligin támiyinlew máselelerine baǵıshlanǵan seminar-májilis ótkerildi.

Seminarǵa “Suwxojalıqnazorat” inspekciyası baslıǵınıń orınbasarı Z.Irisbaev, inspekciyanıń Qaraqalpaqstan Respublikası basqarmasınıń basshıları hám qánigeleri, “Quwanısh-jarma” irrigaciya sistemaları basqarmasınıń baslıǵı Q.Primbetov, “Súwenli,” “Kattagar-Bozataw” irrigaciya sistemaları basqarmalarınıń juwapker xızmetkerleri qatnastı.

Ilajda shıǵıp sóylegen Z.Irisbaev gidrotexnikalıq obektlerdi qurıw, rekonstrukciyalaw hám ekspluataciyalawda qáwipsizlikti támiyinlew tiykarǵı wazıypa ekenin atap ótip, ayrıqsha jaǵdaylardıń aldın alıw, avariyalıq rezerv materialların tayar halda saqlaw, suw esabın júrgiziw hám suwdan paydalanıw qaǵıydalarına qatań ámel etiw zárúrligin atap ótti.

Seminar qatnasıwshıları “Doslıq” magistral kanalındaǵı imarattıń texnikalıq jaǵdayın kózden ótkerdi hám anıqlanǵan kemshiliklerdi óz waqtında saplastırıw boyınsha juwapkerlerge tapsırmalar berildi.

Qaraqalpaqstan Respublikası

Suw xojalıǵı ministrligi baspasóz xızmeti