Ózbekstan Respublikası Suw xojalıǵı ministri Sh.Xamraevtıń Beruniy rayonında fizikalıq hám yuridikalıq tárepler hám olardıń nızamlı wákilleri menen ashıq sóylesiwi ótkerildi.

    Beruniy rayonınıń “Jaslar orayı” imaratında ótkerilgen ilajda Qaraqalpaqstan Respublikası suw xojalıǵı ministri B.YUsupov, Beruniy rayonı hákimi I.Xidirov, “Suwqadaǵalaw” inspekciyası Qaraqalpaqstan Respublikası basqarmasınıń baslıǵı I.YUldashev, “Paxtaarna-Nayman” irrigaciya sistemasınıń baslıǵı YU.Komekov, Beruniy nasos stanciyaları hám energetika basqarmasınıń baslıǵı J.Xalmuratov, Meliorativ ekspediciyasınıń baslıǵı I.Janabaev, Beruniy rayonı “Suw jetkerip beriw xızmeti” DM direktorı J.Eshanov, sonday-aq, awıl hám suw xojalıǵı qánigeleri, klaster hám fermer xojalıqlarınıń basshıları qatnastı.

    Ilaj aldında, Suw xojalıǵı ministri Sh.Xamraev Suw xojalıǵı ministri Sh.Xamraev sońǵı jılları Húrmetli Prezidentimiz suw jetispewshiliginiń aldın alıwǵa áhmietli wazıypa sıpatında qarap, region xalıqlarınıń abadanlıǵı jolında alǵa qoyıp atırǵan baslamaları ámeliy nátiyjeler berip atırǵanın ayrıqsha atap ótti. Atap aytqanda, Aralboyında suw shıǵınların azaytıw, kanallardı betonlaw boyınsha keń kólemli jumıslar ámelge asırılǵanın atap ótti. Jáhán banki qatnasıwındaǵı “Qubla Qaraqalpaqstanda suw resursların basqarıwdı jaqsılaw” joybarı sheńberinde Bostan kanalında ámelge asırılǵan rekonstrukciya jumısları hám Tórtkúl, Ellikqala hám Beruniy rayonlarında suw resursların basqarıwdı jaqsılawǵa erisilgeni aytıp ótildi.

Ashıq sóylesiw tárizinde ótkerilgen ilajda fermer xojalıqları basshıları, basqa da suwdan paydalanıwshılardıń múrájatları tıńlandı.

Sonıń ishinde, “Kuchkinov Qudrat,” “Urazboy Nurman,” “Azizbek Musabek,” “Bunyodbek parrandachi” hám “Nuriyev Madiyor” fermer xojalıqlarınıń wákilleri ózleriniń múrájatların jolladı. Barlıq múrájatlarǵa ministr tárepinen hár tárepleme túsinikler berildi.

Juwapker basshılarǵa kelip túsken múrájatlardı nızamda belgilengen tártipte úyreniw, orınlanıwın qadaǵalaw hám nátiyjeleri boyınsha múrájat etiwshilerge juwmaqlawshı juwap xatların jiberiw boyınsha tiyisli kórsetpeler berildi.

Sonday-aq, aymaqlardaǵı bar mashqalalardı orınlarǵa shıqqan halda úyreniw, xalıqtı qıynap kiyatırǵan máselelerdi jedel hám nátiyjeli sheshiw maqsetinde basshılarǵa kóshpeli qabıllawlardı turaqlı shólkemlestiriw usınıs etildi.

Qaraqalpaqstan Respublikası

Suw xojalıǵı ministrligi baspasóz xızmeti