Nókis qalasında Qaraqalpaqstan Respublikası Ministrler Keńesiniń Baslıǵı F.Ermanov hám Ózbekstan Respublikası Suw xojalıǵı ministri Sh.Xamraevtıń qatnasıwında májilis ótkerildi.

Qaraqalpaqstan Respublikasındaǵı ministrlikler, uyımlar hám shólkemlerdiń basshıları hám aymaqlardaǵı studiyalardan rayon hákimleri, tiyisli juwapkerler qatnasqan májiliste 2025-jılǵı Nawrız ulıwmaxalıqlıq bayramına tayarlıq kóriw máselesi dodalandı.

Atap ótilgenindey, Shıǵısqa tán jańa jıl – Nawrız álem ásirler dawamında miyrim-shápáát, miynet hám dóretiwshilik tımsalı sıpatında xalqımız turmısında sheksiz orın ielep kelmekte. Prezidentimizdiń 2025-jıl 21-fevraldaǵı “2025-jılǵı Nawrız ulıwmaxalıqlıq bayramına tayarlıq kóriw hám onı ótkeriw haqqında”ǵı qararında usı jılı bul bayram mámleketimizde “Qádiriyatlarıń máńgi bolsın, Nawrız!” degen bas ideya tiykarında keńnen belgileniwi belgilep qoyıldı.

Ministrler Keńesinde ótkerilgen májiliste jaqınlasıp kiyatırǵan Nawrız ulıwmaxalıqlıq bayramına puqta tayarlıq kóriw maqsetinde Respublikalıq jumısshı topar dúzilgeni hám olar qala hám rayon orayları, awıllıq elatlı punktlerde abadanlastırıw hám kóklemzarlastırıw, sonday-aq, jańa sistema tiykarında xalıqtıń qıytaq jerlerinen nátiyjeli paydalanıw boyınsha ámelge asırılıp atırǵan jumıslardı úyreniw hám járdemlesetuǵını atap ótildi.

Májiliste “Kámbaǵallıqtan abadanlıqqa qaray” baǵdarlaması sheńberinde xalıqtıń qıytaq jerlerin suw menen támiyinlew baǵdarında ámelge asırılıp atırǵan jumıslar boyınsha aymaqlardaǵı juwapkerlerdiń málimlemeleri tıńlandı hám bul baǵdardaǵı jumıslardı jedellestiriw boyınsha wazıypalar belgilep alındı. Sonday-aq, báhárgi abadanlastırıw hám “Jasıl mákan” baǵdarlaması, kanallar, ishki salmalardı betonlaw hám jámietlik orınlar, sonıń ishinde, qoyımshılıqlardı abadanlastırıw, tazalaw boyınsha hámsharlar shólkemlestiriw máseleleri de dodalanıp, ámelge asırılatuǵın ilajlar belgilep alındı.

Qaraqalpaqstan Respublikası

Suw xojalıǵı ministrligi baspasóz xızmeti