Qaraqalpaqstan nasos stanciyaları hám energetika basqarması juwapkerleriniń qatnasıwında Nókis rayonındaǵı “Shımbergen” nasos stanciyasında elektr energiyasınan nátiyjeli paydalanıw, nasos stanciyaları agregatların ońlaw hám gúz máwsiminde nál egiwge jer tayarlaw boyınsha seminar ótkerildi.

   Ilajda Ózbekstan Respublikası Prezidentiniń 2024-jıl 14-iyundegi “Energiya resurslarınan paydalanıw nátiyjeliligin arttırıw boyınsha qosımsha ilajlar haqqında”ǵı qararınıń 5-qosımshasınıń 4-bántinde belgilengen wazıypalardıń orınlanıwın támiyinlew, nasos stanciyalarına zamanagóy energiya únemlewshi qurılmalardı ornatıw hám agregatlardı sapalı ońlaw sıyaqlı máseleler keńnen dodalandı.

Basqarmanıń Energetika bólimi uchastka baslıǵı Q.Aliyev elektr energiyasınan nátiyjeli paydalanıw boyınsha ámelge asırılıp atırǵan jumıslar boyınsha málimleme berdi.

Atap ótilgenindey, házirgi kúnge shekem 6 dana nasos, 19 dana elektr dvigatel, 44 dana kondensator ornatılǵanı esabınan jılına ortasha 659,015 mıń kVt elektr energiyasınıń únemleniwine erisilgen.

Seminarda nasos stanciyalarında 2025-2026-jıllar gúzgi-qısqı máwsiminde nasos agregatların ońlaw-tiklew jumısların sapalı orınlaw, agregatlardı saz jaǵdayda zıyansız isletiw boyınsha túsinikler berildi.

Sonday-aq, nasos stanciyası átirapındaǵı járdemshi xojalıqlarda alıp barılıp atırǵan jumıslar úyrenildi.

“Nókis-Kegeyli” bólimi baslıǵı I.Talibaev bólimde nasos stanciyaları átirapında 2 sotıxlıq egislik maydanda awıl xojalıǵı ónimleri jetistirilip jumısshı-xızmetkerlerdi qosımsha xoshametlew maqsetinde biypul tarqatıp berilip atırǵanlıǵın aytıp ótti. Juwapkerler bul baǵdardaǵı jumıslardı barlıq nasos stanciyalarında shólkemlestiriw boyınsha kórsetpeler berdi.

Qaraqalpaqstan Respublikası

Suw xojalıǵı ministrligi baspasóz xızmeti