Aldın xabar bergenimizdey, Qaraqalpaqstan Respublikası rayonlarında biyday maydanların iyiliwsheń qubırlar járdeminde suwǵarıw boyınsha kórgizbeli ilajlar shólkemlestirilmekte.
Xojeli hám Shomanay rayonlarında ótkerilgen ilajlarda Suw xojalıǵı ministrliginiń juwaplı xızmetkeri qatnasıp, iyiliwsheń qubırlardı paydalanıp suwǵarıwdıń abzallıqları haqqında maǵlıwmatlar berildi.
– Xojeli rayonında máwsim dawamında 350 gektar maydandı iyiliwsheń qubırlar járdeminde suwǵarıw rejelestirilgen, – deydi Qaraqalpaqstan Respublikası Suw xojalıǵı ministrliginiń Suwdı únemleytuǵın suwǵarıw texnologiyaların engiziw boyınsha bas qánigesi Abu Qidirbaev. – Bıyılǵı jılǵı rejege muwapıq, 20 gektar maydanda tamshılatıp suwǵarıw, 136 gektar maydanda jawınlatıp suwǵarıw texnologiyasınıń qurılısı qarjılandırılıp, qurılıs-montajlaw jumısları alıp barılmaqta.
Házirgi waqıtqa shekem 188 gektar maydanda iyiliwsheń qubırlar hám 76 gektar maydanda jawınlatıp suwǵarıw texnologiyaları qurılıp, suwǵarıw jumıslarında paydalanılmaqta. Sonday-aq, paxta egiletuǵın 2 mıń gektardan aslam maydan lazerli úskeneler járdeminde tegislew jumısları ámelge asırıldı.
Rayonlarda ótkerilip atırǵan kórgizbeli ilajda iyiliwsheń qubır járdeminde suwǵarıwdıń abzallıqları haqqında maǵlıwmat berip, fermerlerge bul texnologiyadan keńnen paydalanıwdı usınıs etemiz.
Shomanay rayonındaǵı Aqılbek Dawletov atındaǵı fermer xojalıǵınıń ǵálle maydanlarında iyiliwsheń qubırlar járdeminde suwǵarıw boyınsha ótkerilgen kórgizbeli ilajda bir neshe fermerler usı texnologiyadan paydalanıw boyınsha qızıǵıwshılıq bildirdi. Olarǵa shártnama tiykarında satıp alıw hám paydalanıw boyınsha usınıslar berildi.
Maǵlıwmat ushın: Shomanay rayonında 2025-jılı 5 mıń 170 gektar maydanda suwdı únemleytuǵın texnologiyalardı engiziw rejelestirilgen bolıp, sonnan 350 gektarında iyiliwsheń qubırlar járdeminde suwǵarıw belgilengen.
Qaraqalpaqstan Respublikası
Suw xojalıǵı ministrligi Baspasóz xızmeti