Nókis qalasındaǵı “Suwshılar mektebi”nde Qaraqalpaqstan Respublikası Suw xojalıǵı ministrliginiń baslaması menen suw xojalıǵı tarawındaǵı startaplardı qollap-quwatlawǵa baǵıshlanǵan áhmietli ilaj bolıp ótti.
Ilajda Qaraqalpaqstan Respublikasında irrigaciya hám melioraciya baǵdarında bilim alıp atırǵan studentler, magistrantlar, jas ilimpazlar hám suw xojalıǵı sisteması shólkemleriniń basshıları qatnastı.
Ilaj aldında Qaraqalpaqstan Respublikası Suw xojalıǵı ministriniń birinshi orınbasarı A.Urazimbetov shıǵıp sóylep, Ózbekstan Respublikası Prezidentiniń 2026-jıl 11-fevraldaǵı “Startaplardı qollap-quwatlawdıń kompleksli ekosistemasın engiziw ilajları haqqında”ǵı qararınıń mazmun-mánisine toqtap ótti. Ol óz shıǵıp sóylegen sózinde usı qarardıń 1-qosımshasında startap ekosistemasınıń baǵdarları boyınsha juwapker shólkemler, joqarı bilimlendiriw mákemeleri hám banklerdiń dizimi belgilengenligin atap ótti.
Atap aytqanda, qarardıń tiyisli bántine muwapıq, suw xojalıǵı baǵdarındaǵı startaplar ushın juwapker joqarı bilimlendiriw mákemeleri hám birge islesiwshi shólkem sıpatında “Agrobank” AKB biriktirilgeni atap ótildi. Sonday-aq, ilimiy xızmetkerler hám student jaslardıń suw xojalıǵı tarawındaǵı startapların hár tárepleme qollap-quwatlaw, olardı ámeliyatqa engiziwde birge islesiwdi kúsheytiw maqsetinde tarawdaǵı sistema shólkemleriniń basshıları da ilajǵa mirát etilgenligi atap ótildi.
Ilaj dawamında Nókis qalasındaǵı “IT Park”tiń startaplardı rawajlandırıw bóliminiń bas menedjeri R.Kosnazarov, “Agrobank” AKB bólim baslıǵı N.Otegenov hám Irrigaciya hám suw mashqalaları ilimiy-izertlew institutı janındaǵı Qaraqalpaqstan regionallıq orayınıń direktorı S.Kurbanbaev shıǵıp sóylep, startaplardı rawajlandırıw procesi, sonday-aq, suw xojalıǵı tarawında ámelge asırılıp atırǵan innovaciyalıq joybarlar haqqında maǵlıwmat berdi.
Atap ótilgenindey, usı qararǵa muwapıq mámleketimizde startaplardı ideya basqıshınan baslap, olardı iske qosıw hám xalıqaralıq bazarǵa alıp shıǵıwǵa shekemgi tórt basqıshlı kompleksli ekosistema engizilmekte. Bul bolsa, ásirese, suw xojalıǵı sıyaqlı strategiyalıq áhmietke ie tarawda innovaciyalıq sheshimlerdi islep shıǵıw hám olardı ámeliyatqa engiziw ushın keń imkaniyatlar jaratadı.
Ilajda suw xojalıǵı baǵdarında óz startapların islep shıǵıp atırǵan jas ilimpazlar, magistrantlar hám studentler óz ideyaları boyınsha prezentaciya jasadı. Tarawdıń juwapker xızmetkerleri hám ilimpazlar tárepinen usı startap ideyaları, tarawdaǵı mashqalalar hám olardıń sheshimleri dodalandı.
Sonıń ishinde, suw resursların únemlew, sanlı monitoring sistemaların engiziw, gidrotexnikalıq obektlerdi nátiyjeli basqarıw sıyaqlı baǵdarlarda innovaciyalıq joybarlardı islep shıǵıw zárúr ekenligi atap ótildi. Sonıń menen birge, startaplar ústinde islep atırǵan jaslarǵa ámeliy járdem kórsetiw maqsetinde sistema shólkemleri biriktirildi.
Ilaj juwmaǵında qatnasıwshılar ózlerin qızıqtırǵan sorawlarǵa juwap aldı jáne suw xojalıǵı tarawında startap ekosistemasın bunnan bılay da rawajlandırıw boyınsha usınıs hám baslamalar bildirildi. Bunday ushırasıwlardı keleshekte de turaqlı shólkemlestiriw zárúrligi atap ótildi.
Qaraqalpaqstan Respublikası
Suw xojalıǵı ministrliginiń baspasóz xızmeti