Qaraqalpaqstan nasos stanciyaları hám energetika basqarması juwapkerleriniń qatnasıwında Shımbay rayonı aymaǵında jaylasqan “Tonmoyin” nasos stanciyasında elektr energiyasınan nátiyjeli paydalanıw hám nasoslardan nátiyjeli paydalanıw boyınsha ámelge asırılıp atırǵan jumıslar úyrenildi.
Kórgizbeli seminar túrinde ótkerilgen ilajda elektr energiyasın únemlew, nasos stanciyaları agregatların ońlaw, miynetti qorǵaw hám texnika qáwipsizligi jáne nasos stanciyaları átirapında járdemshi xojalıqlardı shólkemlestiriw máseleleri dodalandı. Sonday-aq, bar bolǵan texnikalıq úskeneler hám agregatlardıń úzliksiz islewin támiyinlew boyınsha tájiriybe almasıldı.
Ilaj dawamında juwapker qánigeler tárepinen miynetti qorǵaw hám texnika qáwipsizligi boyınsha da tiyisli túsinik jumısları alıp barıldı hám bul baǵdardaǵı talaplarǵa ámel etiwdiń áhmieti ayrıqsha atap ótildi. Sonıń ishinde, ámeldegi nızamshılıq hám tastıyıqlanǵan instrukciyalarǵa qatań ámel etiw shárt ekenligi, jumıs baslanıwdan aldın orınlanıwı kerek bolǵan talaplar, jumıs procesinde ámel etiletuǵın qáwipsizlik qaǵıydaları, Ayrıqsha jaǵdaylarda orınlanıwı kerek bolǵan ilajlar hám jumıs juwmaqlanǵannan keyin orınlanatuǵın háreketler boyınsha kórgizbeli qurallar járdeminde keńnen túsindirildi.
Qaraqalpaqstan Respublikası
Suw xojalıǵı ministrligi baspasóz xızmeti