Nókis qalasında Ózbekstan Respublikası Prezidentiniń 2026-jıl 2-iyuldegi “Balıqshılıq tarmaǵın rawajlandırıwǵa baylanıslı qosımsha ilajlar haqqında”ǵı PP-122-sanlı Pármanında belgilengen wazıypalardıń orınlanıwına baǵıshlanǵan seminar-májilis ótkerildi.
Ilajǵa Qaraqalpaqstan Respublikası Ministrler Keńesiniń Baslıǵı F.Ermanov, Suw xojalıǵı ministrligi, “Qaraqalpaqbalıq” associaciyası hám balıqshılıq xojalıqlarınıń basshıları qatnastı.
Prezidentimizdiń “Balıqshılıq tarmaǵın rawajlandırıwǵa baylanıslı qosımsha ilajlar haqqında”ǵı Pármanında belgilengen wazıypalar boyınsha “Suwxojalıqnazorat” inspekciyası baslıǵınıń orınbasarı Z.Irisbaev, Qaraqalpaqstan Respublikası Suw xojalıǵı ministri B.YUsupov, “Qaraqalpaqbalıq” associaciyasınıń baslıǵı X.Bekchanov bayanat hám prezentaciyalar jasadı.
Olarda balıqshılıq tarmaǵın jedel rawajlandırıw, xojalıqlardı suw menen turaqlı támiyinlew, suw resurslarınan aqılǵa uǵras hám nátiyjeli paydalanıw, suw alıw kólemlerin anıq esapqa alıw, sonday-aq, tarawda zamanagóy hám resurs únemlewshi texnologiyalardı keńnen engiziw máselelerine ayrıqsha itibar qaratıldı.
Sonıń ishinde, balıqshılıq xojalıqlarına suw limitlerin ajıratıwda suwǵa bolǵan haqıyqıy talaptı esapqa alıw, suw alıw hám jetkerip beriw kólemleriniń anıq esabın júrgiziw, elektron shártnamalardı engiziw hám suw ólshew qurallarınan nátiyjeli paydalanıw zárúr ekenligi atap ótildi.
Ilajdıń ekinshi bólimi ashıqtan-ashıq sóylesiw tárizinde ótkerilip, Ministrler Keńesiniń Baslıǵı F.Ermanov balıqshılıq xojalıqlarınıń mashqala hám usınısların tıńladı. Kóterilgen máselelerdiń sheshimleri Pármanda belgilengen wazıypalardan kelip shıǵıp dodalandı, olardı ornına shıǵıp úyreniw hám unamlı sheshiw boyınsha juwapkerlerge tiyisli kórsetpeler berildi.
Ashıqtan-ashıq sóylesiwde xojalıqlar tárepinen suw támiynatı, suw alıw kólemlerin belgilew, shártnamalardı rásmiylestiriw hám suw ólshew qurallarınan paydalanıw boyınsha sorawlar berildi. Sorawlarǵa juwap beriwde balıqshılıq tarmaǵında suwdan nátiyjeli paydalanıw hám anıq esap-sanaqtı támiyinlewge qaratılǵan Pármannıń talapları tiykar etip alındı.
Házirgi waqıtta Qaraqalpaqstan Respublikasında jámi 691 tábiyǵıy hám jasalma balıqshılıq kólleri bolıp, sonnan 138 i tábiyǵıy, 553 i jasalma kóller bolıp esaplanadı. Olardıń 495 i kanallar, 196 sı kollektorlar arqalı suw menen támiyinlenbekte.
2026-jıl suwǵarıw dáwirinde 335 balıqshılıq xojalıǵına 46 mln 667 mıń m3 suw limiti ajıratılǵan bolıp, 332 xojalıq penen “Suw esabı” málimleme sisteması arqalı shártnamalar rásmiylestirilgen. Búgingi kúnge shekem usı sistemaǵa 224 balıqshılıq xojalıǵı boyınsha 14 mln 621 mıń m3 suw muǵdarı jaylastırılǵan.
Májilis juwmaǵında balıqshılıq xojalıqlarınıń suw támiynatına baylanıslı esap-sanaqlardı xatlawdan ótkeriw, elektron shártnamalardı rásmiylestiriw, suw ólshew quralların engiziw, suwdan paydalanıw ústinen sanlı qadaǵalawdı kúsheytiw jáne ashıqtan-ashıq sóylesiwde kóterilgen mashqalalardı ornına shıǵıp úyreniw hám saplastırıw boyınsha juwapkerlerge anıq wazıypalar belgilendi.
Qaraqalpaqstan Respublikası
Suw xojalıǵı ministrligi baspasóz xızmeti