Búgin Ózbekstan Respublikası Suw xojalıǵı ministri Sh.Xamraev Qońırat rayonında bolıp, tarawda ámelge asırılıp atırǵan jumıslar menen jaqınnan tanıstı.

Ministr dáslep Prezidentimizdiń tiyisli qararı tiykarında rekonstrukciyalanıp atırǵan “Jinishke” kanalınıń betonlanıp atırǵan bólegin barıp kórdi.

Qońırat rayonı orayınan aǵıp ótiwshi “Jinishke” kanalınıń 2,5 kilometr bóleginde betonlaw jumısların alıp barıw rejelestirilgen. Búgingi kúnde “Qubla Bunyodkor Janubiy” JShJ qurılıs shólkemi tárepinen betonlaw jumısları alıp barılmaqta. Bul kanalda rekonstrukciya jumısları juwmaqlanǵannan soń, rayon orayındaǵı máhálleler hám “Órnek” hám “Ádebiyat” awıl puqaralar jıyınları aymaqlarınıń suw támiynatı jaqsılanadı.

Suw xojalıǵı ministri qurılıs shólkeminiń juwapkerlerine qosımsha texnika hám jumısshı kúshin tartıp, betonlaw jumısların jedellestiriw boyınsha tapsırma berdi. Erteńnen baslap jumısshılardı 100 ge jetkeriw, Nawrız bayramına shekem kanaldıń 1,5 kilometr bólegin betonlawdı juwmaqlaw boyınsha wazıypalar belgilendi.

Usı jerde Qońırat rayonı hákimi B.Madaminov penen ushırasıp, rayonda irrigaciya tarmaqların betonlaw, “Kámbaǵallıqtan abadanlıqqa qaray” baǵdarlaması sheńberinde xalıqtıń qıytaq jerlerine suw jetkeriw baǵdarındaǵı jumıslardıń barısı hám aldaǵı wazıypalardı dodalap aldı.

Rayon hákimi hám aymaqtaǵı suw xojalıǵı juwapkerleri menen birgelikte “Xorezm” hám “Órnek” awıllarındaǵı ishki kanal hám salmalardı betonlaw boyınsha ámelge asırılıp atırǵan jumıslar menen de tanıstı. Ishki kanal hám salmalardı betonlaw baǵdarındaǵı ilajlardı jedellestiriw boyınsha kórsetpeler berildi.

Qaraqalpaqstan Respublikası

Suw xojalıǵı ministrligi baspasóz xızmeti