Irrigaciya hám suw mashqalaları ilimiy-izertlew institutı janındaǵı Qaraqalpaqstan regionallıq orayınıń ilimpazları tárepinen usı kúnlerde rayonlarda suw xojalıǵı tarawındaǵı áhmietli mashqalalar, olardıń kelip shıǵıw sebepleri hám sheshimlerine baǵıshlanǵan ámeliy seminarlar shólkemlestirilmekte.
Atap aytqanda, Nókis rayonındaǵı “Suwshılar mektebi” tájiriybe uchastkasınıń atızlarında rayon fermer xojalıqları wákilleriniń qatnasıwında seminar ótkerildi. Onda egislik maydanlarında shor juwıw processlerinde ushırasıp atırǵan mashqalalar tallanıp, “Shor juwıw norması hám múddetleri” atamasında oray ilimpazları tárepinen ilimiy usınıslar berildi.
Sonday-aq, ilaj dawamında suwdı únemlewshi texnologiyalardı engiziw, jerlerdiń meliorativlik jaǵdayın turaqlı saqlaw hám bar suw resurslarınan nátiyjeli paydalanıw máseleleri boyınsha da qatnasıwshılarǵa túsinikler berildi.
Seminarǵa Irrigaciya hám suw mashqalaları ilimiy-izertlew institutı janındaǵı Qaraqalpaqstan regionallıq orayınıń direktorı S.Kurbanbaev, sonday-aq, oraydıń ilimpazları G.Aminova, O.Karimova hám basqalar ózleriniń prezentaciyaları menen qatnastı.
Seminarda Irrigatsiya va suv muammolari ilmiy-tadqiqot instituti huzuridagi Qoraqalpog‘iston mintaqaviy markazi direktori S. Kurbanbayev, shuningdek markaz olimlari G. Aminova, O. Karimova va boshqalar o‘z taqdimotlari bilan ishtirok etdilar.
Áhmietli temaǵa baǵıshlanǵan seminar Kegeyli rayonındaǵı “Qayıp Mayshı” fermer xojalıǵınıń atızında da dawam ettirildi. Onda suw tamtarıslıǵı sharayatında shor juwıw jumısların nátiyjeli shólkemlestiriw, suwdı únemleytuǵın suwǵarıw texnologiyalarınan durıs paydalanıw hám olardı ekspluataciyalaw boyınsha ilimpazlar tárepinen tayarlanǵan ilimiy usınıslar fermerlerge túsindirildi. Sonday-aq, seminar qatnasıwshılarına tiyisli usınıslar toplamı tarqatıldı.
Irrigaciya hám suw mashqalaları ilimiy-izertlew institutı janındaǵı Qaraqalpaqstan regionallıq orayı ilimpazlarınıń qatnasıwındaǵı bunday ámeliy seminarlardı Qaraqalpaqstan Respublikasınıń basqa da rayonlarında ótkeriw rejelestirilgen.
Qaraqalpaqstan Respublikası
Suw xojalıǵı ministrligi baspasóz xızmeti