Xojeli rayonı “Suw jetkerip beriw xızmeti” mámleketlik mákemesi xızmetkerlerine suw tutınıwshıları menen olarǵa ajıratılǵan suw limitleri sheńberinde shártnamalar dúziliwi hám olardı belgilengen tártipte dizimnen ótkeriw máseleleri túsindirildi.

Ámeliy seminar tárizinde ótkerilgen ilajda Qaraqalpaqstan Respublikası Suw xojalıǵı ministrliginiń Suw jetkerip beriw xızmeti jumısın muwapıqlastırıw bóliminiń baslıǵı E.Turdıbaev shıǵıp sóylep, suw tutınıwshıları menen olarǵa ajıratılǵan suw alıw limitleri sheńberinde suwdan paydalanıw yamasa suw tutınıwı haqqındaǵı shártnamalardıń dúziliwi hám olardı belgilengen tártipte dizimnen ótkeriw tártipleri boyınsha tolıq túsinik berdi.

Sonday-aq, aymaqtaǵı suw xojalıǵı xızmetkerleri Ózbekstan Respublikasınıń “Suw hám suwdan paydalanıw haqqında”ǵı Nızamı hám Ózbekstan Respublikası Ministrler Kabinetiniń 2013-jıl 13-marttaǵı “Ózbekstan Respublikasında suwdan paydalanıw hám suw tutınıw tártibi haqqındaǵı Rejeni tastıyıqlaw haqqında”ǵı 82-sanlı hám 2021-jıl 3-apreldegi “Suwdan paydalanıw hám suw tutınıwda suw resurslarınıń esabı hám esabatın jáne monitoringin júrgiziw tártibin jánede jetilistiriw ilajları haqqında”ǵı 174-sanlı qararları tiykarında óz jumısların alıp barıw zárúrligi keltirip ótildi.

Házirgi kúnlerde Suw xojalıǵı ministrligi juwapkerleri basqa rayonlardaǵı “Suw jetkerip beriw xızmeti” mámleketlik mákemeleri xızmetkerleriniń joqarıda keltirilgen máseleler boyınsha jeke juwapkershiligin kúsheytiw maqsetinde ámeliy seminar ótkermekte.

Bunnan gózlengen maqset suw tutınıwshıları menen suw alıw limitlerin tastıyıqlaw, shártnamalar dúziw hám suwdıń esabın júrgiziw jumısların sistemalı túrde shólkemlestiriw bolıp esaplanadı.

Qaraqalpaqstan Respublikası

Suw xojalıǵı ministrligi baspasóz xızmeti