Búgin, yaǵnıy 14-mart kúni Qaraqalpaqstan Respublikasındaǵı awır jaǵdaydaǵı 96 máhállege biriktirilgen ministrlikler hám uyımlardıń basshıları tárepinen Xalıq qabıllawxanaları menen birgelikte ótkeriletuǵın kóshpeli qabıllawlar kestesine muwapıq, Kegeyli rayonında suw xojalıǵı basshılariniń  kóshpeli qabıllawları bolıp ótti.

Rayondaǵı “Abat” hám “Janabazar” awıl puqaralar jıyınındaǵı mektep imaratlarında ótkerilgen kóshpeli qabıllawda Qaraqalpaqstan Respublikası Suw xojalıǵı ministri B.Juzbaev hám Ózbekstan Respublikası Suw xojalıǵı ministrligi janındaǵı “Suwxojalıqnazorat” inspekciyasınıń baslıǵı R.Raximov, Xalıq qabıllawxanasınıń rayondaǵı basshısı hám rayon hákiminiń orınbasarınıń qatnasıwında suw xojalıǵı, atap aytqanda, qıytaq jerlerge suw jetkeriw, “Kámbaǵallıqtan abadanlıqqa qaray” baǵdarlaması sheńberinde xalıqtı qıynap kiyatırǵan mashqalalar boyınsha múrájatların tıńladı.

Awıl xalqı tiykarınan qıytaq jerlerine suw jetkerip beriw máselesi boyınsha múrájat etti. Sonday-aq, kanallar qazılıwı nátiyjesinde az suw kelgende onnan qıytaq jerlerdi suwǵarıw imkaniyatı bolmay atırǵanı, qazıp tazalaw jumıslarında jer maydanları menen suwdıń qáddin esapqa alıw boyınsha da múrájatlar boldı.

Kóshpeli qabıllaw dawamında ishki kanallardıń ılay toplanıp suw jolın tosıp turǵan bólimlerin ekskavator tartıp qazıw, qosımsha suw ajıratıw sıyaqlı máseleler usı jerdiń ózinde sheshildi. Qosımsha úyreniw hám waqıt talap etiletuǵın múrájatlar boyınsha aymaqlıq suw xojalıǵı basshılarına tapsırmalar berildi.

“Janabazar” awıl puqaralar jıyınındaǵı xalıq wákilleri bántlik, sociallıq járdem, turaq jaydı ońlaw sıyaqlı máseleler boyınsha da múrájat etti. Suw xojalıǵı ministrligi juwapkerleri bul baǵdardaǵı múrájatlardı da unamlı sheshiw boyınsha járdem beretuǵının ayttı. Sonday-aq, juwapkerler suw xojalıǵı máseleleri boyınsha múrájatlardı ornına barıp da úyrenip, aymaqlıq juwapkerlerge tiyisli kórsetpeler berdi.

Qaraqalpaqstan Respublikası

Suw xojalıǵı ministrligi Baspasóz xızmeti