Qaraqalpaqstan Respublikası Suw xojalıǵı ministrligi hám onıń sistemasındaǵı shólkemlerde jumısshı-xızmetkerlerdi sociallıq qollap-quwatlaw, olardıń dáramatların arttırıw jáne azıq-awqat ónimleri menen támiyinlew maqsetinde “Járdemshi xojalıqlar”dı shólkemlestiriw jumısları izbe-iz dawam ettirilmekte.

Bul baǵdarda Prezidentimizdiń tiyisli párman hám qararları tiykarında suw qorı jer maydanlarınan nátiyjeli paydalanıw boyınsha Ózbekstan Respublikası Suw xojalıǵı ministri Sh.Hamraev tárepinen berilgen tapsırmalardıń orınlanıwın támiyinlew maqsetinde barlıq sistemalı shólkemlerge tiyisli kórsetpeler berilgen. Usı wazıypalar tiykarında suw xojalıǵı shólkemlerinde sharwashılıq, qusshılıq, balıqshılıq, qoyanshılıq, pal hárreshilik hám ıssıxana xojalıqların shólkemlestiriw, sonday-aq, tarawdaǵı jer maydanlarında awıl xojalıǵı eginlerin egiw jumısları ámelge asırılmaqta.

– Ásirese, jumısshı-xızmetkerlerdi azıq-awqat ónimleri menen támiyinlew máselesine ayrıqsha itibar qaratılmaqta, – deydi Qaraqalpaqstan Respublikası Suw xojalıǵı ministrliginiń járdemshi xojalıqlardı shólkemlestiriwge juwapker xızmetkeri Allambergen Xojabekov. – Bunıń ushın sistema shólkemlerinde “Járdemshi xojalıqlar” shólkemlestirilip, hár bir shólkem kesiminde óz aldına “Biznes reje”ler islep shıǵıldı. Qaramal, qoy-eshki, qus, kórke, qoyan, ǵaz, úyrek hám bódene bas sanın kóbeytiw, balıqshılıqtı rawajlandırıw maqsetinde jasalma basseynler shólkemlestiriw jumısları jolǵa qoyılmaqta.

Máselen, “Aral boyı” delta basqarması tárepinen Bozataw rayonında 0,75 gektar, Jaǵalıq qorǵawshı dambalar hám ózeklerdi tártipke salıw imaratları basqarması tárepinen Ellikqala rayonında 0,5 gektarda jasalma balıq basseynleri shólkemlestirildi hám balıq shabaqları taslandı. Suw xojalıǵı shólkemleri arasında “Súwenli” irrigaciya sisteması basqarmasınıń “Kindik ózek” gidrouchastkası, “Quwanısh jarma” irrigaciya sisteması basqarmasınıń Nókis rayonı gidrouchastkasındaǵı hám Beruniy nasos stanciyaları hám energetika basqarmasınıń Beruniy rayonı gidrouchastkasındaǵı járdemshi xojalıqlarınıń jumısların basqalarǵa úlgi sıpatında kórsetiw múmkin. Bul jumıslardı barlıq shólkemlerde jáne de jedellestiriw boyınsha zárúr ilajlar kórilmekte.

Sonday-aq, awıl xojalıǵı ónimlerin jetistiriw maqsetinde 71,5 gektar maydanǵa gúzlik ǵálle, 33,6 gektarǵa toqsanbaslı eginler egilip, házirgi kúnde tárbiyalaw hám suwǵarıw jumısları ámelge asırılmaqta. Sonıń ishinde, 31,3 gektarǵa kartoshka, 30,2 gektarǵa piyaz, 46,1 gektarǵa ovosh, 28,0 gektarǵa asqabaq, 6 gektarǵa palız eginleri egildi.

Bunday ámeliy jumıslar suw xojalıǵı shólkemlerinde qosımsha azıq-awqat rezervin jaratıw, xızmetkerlerdi xoshametlew hám ishki imkaniyatlardan nátiyjeli paydalanıwda úlken áhmietke ie bolmaqta.

Tarawda ámelge asırılıp atırǵan bunday baslamalar jumısshı-xızmetkerlerdi sociallıq qollap-quwatlaw, azıq-awqat qáwipsizligin támiyinlew hám awıl xojalıǵı ónimlerin jetistiriw kólemin arttırıwǵa xızmet etip atırǵanın atap ótiw kerek.

Qaraqalpaqstan Respublikası

Suw xojalıǵı ministrligi baspasóz xızmeti