Qaraqalpaqstan Respublikası Suw xojalıǵı ministri B.YUsupovtıń Taxtakópir rayonında fizikalıq hám yuridikalıq tárepler hám olardıń nızamlı wákilleriniń qatnasıwında kóshpeli qabıllaw ótkerildi.

Onda Ózbekstan Respublikası Suw xojalıǵı ministrligi janındaǵı “Suw xojalıqnazorat” inspekciyasınıń baslıǵı R.Raximov, Qaraqalpaqstan Respublikası Suw xojalıǵı ministrligi janındaǵı Meliorativlik ekspediciyanıń baslıǵı I.Janabaev, Taxtakópir rayonı “Suw jetkerip beriw xızmeti” mámleketlik mákemesiniń direktorı P.Qallibekov, taraw juwapkerleri, fermer xojalıqlarınıń basshıları hám mákan puqaralar jıyınlarınıń wákilleri qatnastı.

Kóshpeli qabıllaw aldınan Qaraqalpaqstan Respublikası Suw xojalıǵı ministri B.YUsupov Suw kodeksiniń mazmun-mánisi, suwdan paydalanıw boyınsha talaplar, suw esabın júrgiziw tártibi hám suw resurslarınan aqılǵa uǵras paydalanıw máselelerine ayrıqsha toqtap ótti.

Qabıllaw dawamında rayon xalqı hám fermer xojalıqları basshıları tárepinen suwdan paydalanıw, suw támiynatı, esap-sanaq hám monitoring máselelerine baylanıslı múrájatlar bildirildi. Atap aytqanda, “Qara ay” APJ aymaǵındaǵı “Sharva Nasil,” “Shukurulla,” “A.Adilov” APJdaǵı “Nurpolat Taxta,” “Atakol” APJ aymaǵında jaylasqan “Smagul” fermer xojalıqlarınıń basshıları óz mashqalaları menen múrájat etti.

Qabıllaw procesinde suw tutınıwshılarınıń múrájatları boyınsha Ózbekstan Respublikası Ministrler Kabinetiniń tiyisli qararlarınıń mazmun-mánisi boyınsha túsinikler berilip, múrájat etiwshilerdiń sorawlarına hár tárepleme juwaplar qaytarıldı.

Atap aytqanda, suwdı únemleytuǵın texnologiyalardı engizgen, suw esabın tolıq júrgizip atırǵan hám gidropost ornatqan fermer xojalıqlarına ámeldegi nızamshılıqqa muwapıq suw salıǵı boyınsha belgilengen jeńillikler bar ekenligi haqqında túsinikler berildi. Sonday-aq, usı jeńilliklerden paydalanıw shártleri, hújjetlerdi rásmiylestiriw tártibi boyınsha juwapker shólkem tárepinen tiyisli maǵlıwmatlar usınıldı.

Sonday-aq, kóshpeli qabıllaw dawamında kelip túsken múrájatlar tiykarında tiyisli bólim hám shólkem basshılarına mashqalalardı belgilengen tártipte sheshiw, orınlanıwın támiyinlew hám nátiyjesi boyınsha múrájat iesine jazba juwap beriw boyınsha anıq tapsırmalar berildi. Usı kóshpeli qabıllaw juwmaqları boyınsha berilgen tapsırmalardıń orınlanıwı Qaraqalpaqstan Respublikası Suw xojalıǵı ministrliginiń juwapker xızmetkerleri tárepinen qatań qadaǵalawǵa alındı.

Qaraqalpaqstan Respublikası

Suw xojalıǵı ministrligi baspasóz xızmeti