Nókis qalasındaǵı “Doslıq úyi”nde “Máhálleni rawajlandırıw hám jámietti joqarılatıw jılı”nda “Ózbekstan – 2030” strategiyasın ámelge asırıw sheńberinde “Ekologiyalıq turaqlılıqtı támiyinlew hám suw resurslarınan aqılǵa uǵras paydalanıwdı nátiyjeli shólkemlestiriw” atamasında ashıqtan-ashıq sóylesiw ótkerildi.

Ilajda Ózbekstan Respublikası Oliy Majlisi janındaǵı jámietlik fond, “YUksalish” ulıwma milliy háreketi, Suw xojalıǵı ministrligi, Fermerler keńesi, Ózbekstan mámleketlik emes kommerciyalıq emes shólkemler milliy associaciyası, puqaralıq jámieti institutları hám ǵalaba xabar qurallarınıń wákilleri qatnastı.

Ilajdı ashıp bergen Oliy Majlis janındaǵı Puqaralıq jámieti institutların qollap-quwatlaw jámietlik fondınıń Qaraqalpaqstan Respublikası bóliminiń baslıǵı Paraxat Turdımuratov bunday sóylesiw hám dógerek sáwbetlerin turaqlı shólkemlestiriwdiń áhmietine toqtap ótti. Sonday-aq, “Ózbekstan – 2030” strategiyası sheńberinde, ásirese, máhállelerde suw támiynatın jaqsılaw baǵdarında ámelge asırılıp atırǵan jumıslar haqqında pikir bildirdi.

Bunnan soń “YUksalish” ulıwma milliy háreketi Qaraqalpaqstan Respublikası aymaqlıq bóliminiń baslıǵı Tájibay Romanov mámleketlik baǵdarlamada puqaralıq jámieti institutlarınıń qatnasıwı boyınsha ámelge asırılıp atırǵan jumıslar haqqında maǵlıwmat berdi.

Bunnan soń, Qaraqalpaqstan Respublikası Suw xojalıǵı ministrliginiń bólim baslıǵı Ruslan Aytjanovtıń suw resurslarınan aqılǵa uǵras paydalanıwdı nátiyjeli shólkemlestiriw baǵdarında ámelge asırılıp atırǵan jumıslar boyınsha málimlemesi tıńlandı.

Málim etilgenindey, 2025-jılı awıl xojalıǵı mútájlikleri ushın jámi 6,96 milliard kub metr suw jetkerip berilip, egislik maydanların suwǵarıw, shor juwıw jumısları jáne xalıq hám fermer xojalıqların suw menen támiyinlew izbe-iz ámelge asırılǵan.

Usı jılı da xalıqtıń qıytaq jerleri hám fermer xojalıqlarınıń egislik maydanlarına suw támiynatın jaqsılawǵa qaratılǵan keń kólemli jumıslar ámelge asırılmaqta. Sonıń ishinde, kanallarda suw shıǵınların azaytıw baǵdarında 2026-jılı jámi 44 km uzınlıqtaǵı 4 kanaldı betonlastırıw jumısları ushın 81 mlrd sum qarjı ajıratılǵan. Sonıń ishinde, Shımbay rayonındaǵı Tagjap kanalı (13,3 km), Shomanay rayonında 8,1 km, Nókis rayonındaǵı “Sorali” kanalı (6,7 km) hám Taqıyatas rayonındaǵı “Eski Keneges” kanalı (15,8 km) nda jumıslar alıp barılmaqta. Házirgi kúnde 37,2 mlrd sumlıq 22,8 km bóleginde betonlastırıw jumısları orınlanǵan bolıp, bul jumıslar izbe-iz dawam ettirilmekte.

Málimlemede tarawdı sanlastırıwǵa da ayrıqsha itibar qaratılǵanı atap ótildi. Sonıń ishinde, irrigaciya hám melioraciya sistemalarında suw esabın júrgiziw hám qadaǵalaw maqsetinde “aqıllı suw,” “dayver” hám onlayn monitoring qurılmaları engizilgen. Sonday-aq, gidropostlarda suwdı onlayn baqlaw sistemasın basqıshpa-basqısh engiziw jumısları ámelge asırılmaqta.

Atap ótiliwinshe, bul ilajlar suw resurslarınan nátiyjeli paydalanıw, shıǵınlardı azaytıw hám sistemanı zamanagóy basqarıwǵa ótkeriwde úlken áhmietke ie bolmaqta.

Esabattan soń ilaj ashıqtan-ashıq sóylesiw tárizinde dawam etip, soraw-juwaplar hám keń túrdegi dodalawlarǵa ulastı. Ekspertler hám ǵalaba xabar qurallarınıń wákilleri ózlerin qızıqtırǵan sorawlarǵa hár tárepleme juwap aldı. Sonday-aq, bunday sóylesiwlerdi turaqlı shólkemlestiriw, suwdan aqılǵa uǵras paydalanıw mádeniyatın arttırıw hám ámelge asırılıp atırǵan jumıslar haqqında jámiechilikti keńnen xabardar etiw boyınsha birgelikte jumıs alıp barıwǵa kelisip alındı.

Qaraqalpaqstan Respublikası
Suw xojalıǵı ministrligi baspasóz xızmeti