Qaraqalpaqstan Respublikasında suw xojalıǵı sisteması xızmetkerleri arasında “Eń jaqsı suwshı kitapqumar” tańlawınıń aymaqlıq basqıshı ótkerildi.
Tańlaw Ózbekstan Respublikası Prezidentiniń 2026-jıl 15-yanvardaǵı PQ-9-sanlı qararında belgilengen wazıypalardıń orınlanıwın támiyinlew, sonıń ishinde, xalıq hám xızmetkerler arasında kitapqumarlıq mádeniyatın arttırıw, kitap oqıwǵa qızıǵıwshılıqtı arttırıw hám kásiplik-tarawlıq ádebiyatlardı oqıwdı keńnen úgit-násiyatlaw maqsetinde shólkemlestirildi.
Tańlawda Qaraqalpaqstan Respublikasındaǵı suw xojalıǵı sisteması shólkemlerinen 20 dan aslam kitapqumar xızmetker qatnasıp, ózleriniń kórkem, ruwxıy-aǵartıwshılıq hám tarawlıq ádebiyatlar boyınsha bilimlerin sınaqtan ótkerdi.
Ilajdıń ashılıw máresiminde Qaraqalpaqstan Respublikası Suw xojalıǵı ministri B.Yusupov qatnastı.
Ashılıw máresiminde atap ótilgenindey, elimizde kitapqumarlıq mádeniyatın arttırıw, kitap oqıwdı keńnen úgit-násiyatlaw hám insanlardıń ruwxıy potencialın arttırıw máselesine mámleketlik siyasat dárejesinde ayrıqsha itibar qaratılmaqta. Usı mánide, Suw xojalıǵı ministrligi tárepinen Ǵárezsizligimizdiń 35 jıllıq bayramı qarsańında shólkemlestirilip atırǵan “Eń jaqsı suwshı kitapqumar” tańlawı da usı iygilikli maqsetlerdi qollap-quwatlawdıń úzliksiz dawamı bolıp esaplanadı.
Atap ótilgenindey, kitap insannıń dúnyaqarasın keńeytedi, pikirin bayıtadı, bilim hám potencialın arttıradı. Ásirese, suw xojalıǵı sıyaqlı joqarı juwapkershilik hám turaqlı izleniwdi talap etetuǵın tarawda xızmetkerlerdiń kásiplik bilimleri menen bir qatarda, olardıń ruwxıy-aǵartıwshılıq dárejesin arttırıw úlken áhmietke ie.
Tańlaw qatnasıwshılarına áwmet hám tabıslar tilep, olardıń kitap oqıwǵa bolǵan qızıǵıwshılıǵın jáne de arttırıw, bilim hám oy-pikirin bayıtıwda bul tańlaw áhmietli orın ieleytuǵını atap ótildi.
Belgilengen tártip tiykarında ótkerilgen tańlaw procesinde qatnasıwshılar usınıs etilgen kórkem, tarawlıq hám motivaciyalıq ádebiyatlar tiykarında tayarlanǵan sorawlar boyınsha bilimlerin kórsetti. Atap aytqanda, ózbek hám qaraqalpaq ádebiyatı ǵayratkerleriniń ómiri hám dóretiwshiligi, milliy ádebiy miyras, suw resurslarınan aqılǵa uǵras paydalanıw, suwdı únemleytuǵın texnologiyalar, kásiplik juwapkershilik hám kitapqumarlıq mádeniyatına baylanıslı sorawlarǵa juwap berdi.
Qızǵın hám mawasasız bellesiwlerge bay ótken tańlaw juwmaǵına bola jeńimpaz hám sıylı orın ieleri anıqlandı.
Tańlaw juwmaǵına bola, birinshi orındı Nasos stanciyaları hám energetika basqarması dispetcherlik xızmetiniń náwbechi dispetcheri Sabirov Jalǵasbek Zaripbay ulı ieledi. Ekinshi orın Ellikqala rayonı “Suw jetkerip beriw xızmeti” mámleketlik mákemesiniń múrájatlar menen islesiw hám atqarıw tártibi boyınsha jetekshi qánigesi Esemuratova Aksungul Turǵanbay qızı, úshinshi orın bolsa Xojeli rayonı “Suw jetkerip beriw xızmeti” mámleketlik mákemesiniń atqarıw tártibi hám múrájatlar menen islesiw boyınsha jetekshi qánigesi Utepbergenova Nilufur Mansur qızına nesip etti.Tańlawda jeńimpaz hám sıylı orın ieleri bolǵan qatnasıwshılar múnásip sıylıqlandı.
“Eń jaqsı suwshı kitapqumar” tańlawınıń Qaraqalpaqstan Respublikası basqıshı suw xojalıǵı sisteması xızmetkerleri arasında kitapqumarlıq ortalıǵın jáne de bekkemlew, kitap oqıwǵa qızıǵıwshılıqtı arttırıw, ruwxıy-aǵartıwshılıq potencialdı joqarılatıw menen bir qatarda, kitap hám kásiplik bilim úylesimliligin támiyinlewge xızmet etken áhmietli ilaj boldı.
Atap ótilgenindey, kitapqumar hám bilimli xızmetker – óz kásibine juwapkershilik penen qatnas jasaytuǵın, jańalıqqa umtılatuǵın hám tarawdaǵı áhmietli wazıypalardı tereń túsinetuǵın qánige bolıp esaplanadı. Sonlıqtan suw xojalıǵı sistemasında kitap oqıwdı úgit-násiyatlawǵa qaratılǵan bunday baslamalardıń áhmieti jáne de artıp baradı.
Qaraqalpaqstan Respublikası
Suw xojalıǵı ministrligi baspasóz xızmeti